EMRAT/ Vranë dhe dogjën të riun në shpellë, një tjetër i arrestuar! Kush është ‘narkosi’ shqiptar që porositi ekzekutimin

Një tjetër arrestim është shënuar në kuadër të hetimeve për vrasjen e Francesco Diviestit, të riut nga Barletta, i cili u ekzekutua më 25 prill 2025, ndërsa trupi i tij u dogj në një zonë rurale të Alta Murgia-s.

Drejtoria Hetimore Antimafia e Barit dhe Sektori i Lëvizshëm i Policisë së Andrias kanë ekzekutuar një masë sigurie “arrest me burg”, të lëshuar nga gjyqtari i hetimeve paraprake i Gjykatës së Barit, me kërkesë të Drejtorisë Antimafia. Masa është caktuar ndaj një personi me precedentë penalë nga Minervino Murge, i dyshuar rëndë për bashkëpunim në vrasje të paramenduar me metoda mafioze, shkatërrim dhe fshehje të kufomës, si dhe mbajtje të paligjshme të armëve të zjarrit.

Sipas hipotezës së hetuesve, i arrestuari dyshohet se u ka siguruar mbështetje logjistike tre personave të dyshuar si autorë të drejtpërdrejtë të krimit, të cilët u arrestuan më 26 maj të këtij viti. Ai dyshohet se i ka ndihmuar si gjatë vrasjes, ashtu edhe në fazën e mëvonshme të fshehjes së armëve dhe shkatërrimit të trupit të viktimës.

Hetimet janë përforcuar edhe nga dëshmitë e një personi që ka shprehur gatishmërinë për të bashkëpunuar me drejtësinë. Ai dyshohet se ka dhënë detaje të panjohura më parë mbi mënyrën se si u krye atentati, të cilat përputhen me provat e mbledhura nga hetuesit.

Sipas rindërtimit të ngjarjes nga autoritetet, krimi e ka zanafillën në një përleshje që ndodhi në mbrëmjen e 25 prillit 2025, mes disa personave me precedentë penalë, në një lokal në Barletta.

Pas konfliktit, Diviesti dyshohet se u dërgua në disa shpella, në një zonë të izoluar të territorit rural të Canosa di Puglia-s, në Alta Murgia. Atje, ndaj tij u qëllua nga afër me pesë plumba, të shkrepur nga dy pistoleta.

Të nesërmen, trupi i pajetë u dogj brenda disa gomave, në përpjekje për të zhdukur çdo gjurmë të krimit.

Sipas hetuesve, vrasja dyshohet se ka ndodhur në kuadër të luftës për kontrollin e aktivitetit të shpërndarjes së drogës në Barletta. Grupi dyshohet se ka vepruar me synimin për të vendosur supremacinë e tij kriminale në territor, duke përdorur metoda mafioze.

Masa e re e sigurisë është pjesë e hetimit që më 26 maj kishte çuar në ekzekutimin e masave të sigurisë ndaj 15 personave. Hetimi u zhvillua nga një ekip i përbashkët mes Drejtorisë së Distriktit Antimafia në Bari dhe Prokurorisë së Posaçme Kundër Korrupsionit dhe Krimit të Organizuar në Tiranë, me mbështetjen e Eurojust-it.

Hetimet zbuluan gjithashtu dyshime për ekzistencën e një skeme ndërkombëtare të pastrimit të parave mes Italisë dhe Shqipërisë, përmes një kompanie shqiptare të dhënies së makinave me qira, e cila dyshohet se kishte mundësuar transferimin e më shumë se një milion eurove brenda gjashtë muajve.

ARRESTOHET 56-VJEÇARI NGA MINERVINO

Një 56-vjeçar me precedentë penalë, nga Minervino Murge, në veri të provincës së Barit, është arrestuar në kuadër të hetimeve për vrasjen e Francesco Diviestit, 26-vjeçarit nga Barletta, i cili u zhduk më 25 prill 2025 dhe u gjet i pajetë katër ditë më vonë në një ndërtesë të braktisur në Canosa di Puglia.

Bëhet fjalë për Francesco Sassin, i cili akuzohet për bashkëpunim në vrasje të paramenduar, shkatërrim dhe fshehje të kufomës, si dhe mbajtje të paligjshme të armëve të zjarrit.

Sipas hetimeve, të koordinuara nga Drejtoria e Distriktit Antimafia në Bari, 56-vjeçari dyshohet se u ka ofruar “mbështetje logjistike tre personave të dyshuar si autorë të drejtpërdrejtë të krimit”: 41-vjeçarit shqiptar Igli Kamberi, Antonio Lanottes, 25 vjeç, nga Barletta, dhe Nicola Dibenedettos, 21 vjeç. Të tre ishin arrestuar në maj të këtij viti.

Arrestimi u krye nga efektivët e Drejtorisë Hetimore Antimafia në Bari, në bashkëpunim me Sektorin e Lëvizshëm të Policisë së Andrias.

Sassi dyshohet se ka pasur rol si gjatë kryerjes së vrasjes, ashtu edhe në fazën e mëvonshme të fshehjes së armëve dhe shkatërrimit të kufomës. Ai dyshohet gjithashtu se ka siguruar gomat që u përdorën për t'i vënë flakën trupit të 26-vjeçarit.

Të rëndësishme për hetimin kanë qenë edhe dëshmitë e një personi që ka shprehur gatishmërinë për të bashkëpunuar me drejtësinë, i cili dyshohet se ka ndihmuar në zbardhjen e dinamikës së vrasjes.

Në mbrëmjen e 25 prillit 2025, Diviesti ishte përfshirë në një përleshje përpara një lokali në Barletta. Më pas, ai u dërgua në një shpellë në një zonë të izoluar të Alta Murgia-s, në territorin e Canosa di Puglia-s, ku u vra me pesë plumba të shkrepur nga dy pistoleta. Trupi i tij u dogj më pas brenda disa gomave.

Sipas hetimeve, ngjarja lidhet me luftën për kontrollin e aktivitetit të shpërndarjes së lëndëve narkotike, që dyshohet se drejtohej nga 41-vjeçari shqiptar Igli Kamberi. Për të vendosur supremacinë e tij kriminale në Barletta, Kamberi dyshohet se ka organizuar vrasjen, në bashkëpunim me dy autorët e tjerë të dyshuar dhe me kontributin e 56-vjeçarit të arrestuar sot. /PiranjatNews/