SPAK zbardh komunikimet për makinën e Ergys Agasit, shefi i Policisë Shkencore i dërgonte detaje për provat e sekuestruara në Land Rover

Detaje të reja nga hetimet e SPAK për Ergys Agasin janë bërë publike, ku në fokus janë komunikimet e tij me Fatjon Kalluçin, shefin e sektorit të laboratorit të Policisë Shkencore, lidhur me provat e sekuestruara në automjetin e tij.

Bëhet me dije se në muajin gusht, përpara arrestimit të Agasit, Kalluçi dyshohet se i ka dërguar tre fotografi nga ekspertiza e automjetit tip “Land Rover Defender”, i sekuestruar gjatë kontrolleve në Equos Resort.

Gjatë kontrolleve, SPAK kishte gjetur në automjet nëntë faqe me dokumente sekrete të SHISH. Sipas hetimeve, Kalluçi dyshohet se e informonte Agasin se provat ishin dërguar të paketuara në laborator, ku do t'i nënshtroheshin ekzaminimeve për gjurmë ADN-je. Nga ana tjetër, Agasi kërkonte informacion se kur ishte kontrolluar automjeti dhe çfarë dokumentacioni ishte mbajtur për sendet e gjetura brenda tij.

Në komunikimet e bëra publike, Kalluçi i sqaronte se këqyrja e automjetit nuk ishte kryer nga laboratori, por drejtpërdrejt nga hetuesit. Ai i kishte bërë të ditur gjithashtu se do të kërkonte procesverbalin e këqyrjes për t'ia dërguar.