Nga shënimet te denoncimi për të birin në vitin 2024/ Si arriti policia greke te Odise Dhima

Tre shënime të shkruara me dorë, në të cilat ishin regjistruar emra sportistësh, shuma parash dhe substancat që ata merrnin, janë gjetur në posedim të trajnerit të peshëngritjes, Odise Dhimas, i cili u arrestua nën akuzën e shpërndarjes së preparateve të ndaluara.

Sipas informacioneve të protothema.gr, hetimet për këtë çështje nisën më 20 dhjetor 2024, pas informacioneve të përcjella në Prokurori nga Organizata Helenike Kundër Dopingut (EOKAN).

Në këto informacione thuhej, ndër të tjera, se trajneri dyshohej se siguronte dhe shpërndante substanca të ndaluara, të cilat i mbante në një magazinë, ku kishte akses ekskluziv, brenda palestrës së peshëngritjes në Qendrën Olimpike Sportive të Athinës (OAKA).

Gjithashtu, nga Nëndrejtoria për Luftën kundër Krimit të Organizuar në Greqinë e Veriut u krye një hetim paraprak pas një denoncimi, në të cilin thuhej se gjatë vitit 2024, një sportist i mitur i peshëngritjes, 15 vjeç, ishte konstatuar duke përdorur substanca anabolike gjatë një gare zyrtare.

Në denoncim thuhej se trajneri i tij, i cili ishte njëkohësisht edhe babai i tij dhe që ishte përmendur edhe në raste të mëparshme të lidhura me dopingun, vijonte të lëvizte i lirë në dhomat e zhveshjes së federatës.

Nga hetimet u konstatua se i mituri ishte djali i Odiseas Dimas dhe se ishte pikërisht trajneri ai që i kishte siguruar substancat.

Më pas, Policia greke kontaktoi EOKAN-in, i cili, përmes një dokumenti zyrtar, bëri të ditur se Odiseas Dimas ndodhej që prej datës 27 maj 2025 nën pezullim të përkohshëm dhe ndaj tij ishte vendosur një dënim me 12 vite pezullim, për dhënien e një substance të ndaluar gjatë garës.

Konkretisht, nga analizat e kryera nga Organizata Kombëtare Greke e Barnave (EOF), si dhe nga një laborator i WADA-s, rezultoi se në një preparat të përdorur nga djali i tij ishte gjetur substanca e ndaluar efedrinë.

Për më tepër, organizata dërgoi vendimin e Komisionit Disiplinor të Shkallës së Parë të EOKAN-it lidhur me zotin Dimas. Sipas këtij vendimi, në një mostër urine të analizuar të djalit të tij, i cili ishte gjithashtu sportist nën drejtimin e tij, ishte zbuluar substanca “Oksandrolonë”, e cila përfshihet në listën e substancave të ndaluara të WADA-s për vitin 2024.

Pas këtyre zhvillimeve, në orët e para të mëngjesit të së enjtes (12 nëntor), policia arrestoi trajnerin dhe ushtroi kontroll në banesën e tij, ku zbuloi një sasi të madhe preparatesh të ndaluara.

Gjithashtu, u gjetën tri faqe me shënime të shkruara me dorë, ku regjistroheshin shitblerje të suplementeve ushqimore. Në to përmendeshin emrat “T. D.” dhe “S. G.”, si dhe shumat përkatëse prej 700 eurosh, 600 eurosh dhe 80 eurosh.

Në dy prej faqeve shënoheshin gjithashtu sasitë dhe preparati “4 COMANDO” dhe “1 COMANDO”.

Sa i përket preparatit “COMANDO”, i përmendur në shënimet e sekuestruara, bëhet me dije se, siç u përmend më sipër, ai dyshohet se ishte një nga preparatet që përdorte djali i trajnerit të akuzuar.

Dimitrakopulos: Këto substanca nuk janë anabolike, ai nuk ka bërë kurrë shpërndarje

Avokati i Odiseas Dimas, Mihalis Dimitrakopulos, deklaroi se substancat për të cilat akuzohet klienti i tij “nuk janë anabolike”, duke shtuar se ai “nuk ka bërë kurrë shpërndarje”. Njëkohësisht, ai u bëri thirrje gazetarëve dhe qytetarëve të respektojnë emrin e vëllait të të akuzuarit, Pirro Dhimas. /PiranjatNews/