U gjet brenda valixhes, policia greke pranë zbardhjes së misterit të vrasjes së 24-vjeçares 

Policia greke është pranë zbardhjes së vrasjes së 24-vjeçares nga Burkina Faso, trupi i së cilës u gjet brenda një valixheje në zonën e Agios Panteleimonas të Athinës. Sipas informacioneve, hetuesit kanë si të dyshuar kryesor një të ri me origjinë afrikane, me të cilin 24-vjeçarja dyshohet se kishte njohje.

Fillimisht, policia mori në pyetje një shtetas nga Kameruni, i cili e kishte strehuar vajzën, por dyshimet për përfshirjen e tij në ngjarje u përjashtuan. Më pas, u morën në pyetje edhe shtetas të tjerë të huaj që e njihnin të renë. Mes tyre ishte edhe i dyshuari kryesor, për të cilin u konstatua se banonte pranë vendit ku u gjet valixhja.

Hetuesit dyshojnë, por kjo mbetet ende për t'u konfirmuar, se mes autorit dhe viktimës ka pasur një konflikt, i cili ka përfunduar me vdekjen e 24-vjeçares.

Mbërritja në Athinë

Kujtojmë se, përpara se të mbërrinte në Athinë, 24-vjeçarja punonte si pastruese në ishullin Folegandros. E reja mbërriti në Athinë më 28 tetor dhe po atë ditë u takua me një mikun e saj nga Kameruni. Gjatë takimit, ajo i kishte thënë se do të shkonte në qendër të Athinës për të pirë një kafe.

Megjithatë, që prej ditës së nesërme, më 29 tetor, gjurmët e saj u zhdukën. Hetuesit e Departamentit të Vrasjeve po përpiqen të zbulojnë se çfarë ndodhi pas komunikimit të fundit të njohur me të.

Ishte pikërisht miku i saj nga Kameruni ai që denoncoi zhdukjen e 24-vjeçares më 4 nëntor, në Komisariatin e Policisë së Kypselit, pasi kishin kaluar disa ditë pa marrë asnjë lajm prej saj. Nga hetimet e autoriteteve është konstatuar se ky shtetas nuk ka asnjë përfshirje në ngjarje.

Trupi i 24-vjeçares u gjet i pajetë brenda një valixheje në zonën e Agios Panteleimonas, pasditen e së dielës, më 8 nëntor.

Identifikimi i saj u bë përmes gjurmëve të gishtërinjve, pasi të dhënat e saj ndodheshin në databazën e Policisë Greke (ELAS). Siç rezultoi, në të kaluarën ajo kishte qenë e regjistruar nga autoritetet për shkelje të legjislacionit mbi të huajt, konkretisht për hyrje të paligjshme në vend.

Sipas gjetjeve të para mjeko-ligjore, dyshohet se e reja kishte humbur jetën rreth shtatë ditë përpara se të gjendej trupi i saj. Megjithatë, deri më tani nuk është përcaktuar shkaku i vdekjes. Ndërkohë, trupi i saj nuk kishte shenja të dukshme dëmtimesh, ndërsa këmbët i kishte të lidhura. /PiranjatNews/