“Po humbisja kontaktin me realitetin”, Françeska rrëfen periudhën e vështirë

Ish-banorja e “Big Brother VIP Albania”, Françeska Murati, ka bërë një rrëfim në rrjetet sociale, duke folur për një periudhë të vështirë të jetës së saj, ndikimin e lajmeve të pavërteta dhe gjërat për të cilat është penduar.

Gjithçka nisi pasi një ndjekës e pyeti se si ndihej dhe për çfarë ishte penduar më së shumti në jetë. Françeska nuk hezitoi të përgjigjej, duke zbuluar se kishte kaluar një periudhë gjatë së cilës nuk ishte ndier aspak mirë emocionalisht.

“Ishte një periudhë që nuk po ndihesha aspak mirë. Isha thjesht në autopilot, duke vazhduar përpara, sepse në fund të fundit, çfarë do bësh tjetër?”, u shpreh ajo.

Françeska tregoi se gjatë asaj kohe përballej vazhdimisht me lajme dhe pretendime të ndryshme që qarkullonin për të nëpër portale. Madje, sipas saj, prindërit ia dërgonin çdo ditë këto publikime.

“Çdo ditë prindërit më dërgonin portale, lajme dhe shpifje të reja. Çdo ditë një histori tjetër, një gënjeshtër tjetër”, rrëfeu ajo, duke shtuar se situata kishte arritur deri në atë pikë sa po fillonte të humbiste kontaktin me realitetin.

Ish-banorja e BBVA foli edhe për pendesat e saj, duke pranuar se për një kohë të gjatë ishte përpjekur të bënte gjithmonë atë që të tjerët prisnin prej saj, në vend që të ndiqte dëshirat personale.

Ajo theksoi se sot e ka kuptuar se, pavarësisht përpjekjeve për të mos gabuar apo zhgënjyer askënd, gjithmonë do të ketë njerëz që do të gjejnë arsye për ta gjykuar.

Në fund, Françeska dha një mesazh për ndjekësit, duke i këshilluar të jetojnë sipas dëshirave të tyre dhe të mos e shtyjnë lumturinë për hir të miratimit të të tjerëve.

“Njerëzit që janë vërtet të lumtur me jetën e tyre nuk e kalojnë kohën duke u përpjekur të shkatërrojnë jetën e dikujt tjetër”, përfundoi ajo.