Ndalimi i Vlora Hysenit/ Reuters: Një tjetër pengesë për qeverinë e Ramës

Arrestimi i Vlora Hysenit, ish-dretoreshës së Shërbimit Informativ Shtetëror ka marrë jehonë kombëtare dhe ndërkombëtare, pasi të shumat kanë qenë mediat e huaja të cilat kanë raportuar në lidhje me këtë ngjarje. Së fundmi për të ka shkruar edhe Reuters, e cila thotë se autoritetet gjyqësore  kanë pezulluar shefen e spiunazhit dhe ka urdhëruar vendosjen e saj nën arrest shtëpiak nën dyshimin e zbulimit të informacionit të klasifikuar, si pjesë e një hetimi më të gjerë për korrupsion.

Vlora Hyseni, e cila është me origjinë nga Kosova, ka shërbyer si drejtuese e shërbimit të inteligjencës Sherbimi Informativ i Shtetit (SHISH) që nga viti 2023. Më parë, ajo ka shërbyer si zëvendës shefe e inteligjencës në Kosovë. Prokurorët thanë se Hyseni dyshohej për zbulimin e informacionit të klasifikuar personave të paautorizuar në lidhje me një çështje korrupsioni në Agjencinë Kombëtare për Shoqërinë e Informacionit (AKSHI), e cila menaxhon shërbimet publike digjitale dhe infrastrukturën IT të Shqipërisë.

Reuters thekson se shumë zyrtarë shtetërorë dhe biznesmenë janë arrestuar ose po hetohen për keqpërdorim të parave publike në AKSHI. SPAK, i cili synon korrupsionin dhe krimin e organizuar, tha se masat kundër Hysenit janë miratuar nga një gjykatë kundër korrupsionit për të lejuar hetime të mëtejshme.

Kryeministri Edi Rama, i cili ndodhet në Nju Jork për Asamblenë e Përgjithshme të Kombeve të Bashkuara, tha se e kishte liruar Hysenin nga detyrat dhe, në konsultim me presidentin, do të emëronte një drejtues të ri të agjencisë së inteligjencës.

Ky veprim është një tjetër pengesë për qeverinë e Ramës. Në shkurt, Rama shkarkoi Zëvendëskryeministren e tij Belinda Balluku pas ngritjes së akuzave për korrupsion ndaj saj. Parlamenti më vonë refuzoi të heqë imunitetin e saj për të lejuar arrestimin e saj. Balluku mohoi akuzat. Zyrtarët e Bashkimit Evropian i kanë thënë Reuters se po shqyrtojnë me kujdes mënyrën se si Rama trajton rastet e korrupsionit dhe se lufta e Shqipërisë kundër krimit dhe korrupsionit ishte thelbësore për përpjekjen e vendit ballkanik për t'u bashkuar me bllokun deri në vitin 2030.