Rruga në gjendje të mjerueshme në Dimal/ Banori ngre dyshime: Ku përfunduan 800 milionë lekët e investimit?

Një denoncim ka mbërritur në redaksinë e Piranjat News nga fshati Çukalat, në Bashkinë Dimal, ku një banor ngre shqetësimin për gjendjen e amortizuar të rrugës.

Në pamjet e dërguara në Piranjat News, rruga shfaqet e mbuluar me gurë dhe me vështirësi të dukshme për qarkullimin. Sipas denoncuesit, për këtë rrugë janë parashikuar 800 milionë lekë të vjetra, por ai pretendon se deri më tani nuk është kryer asnjë ndërhyrje.

Banori ngre dyshime se fondet mund të jenë përdorur për qëllime të tjera, ndërsa kërkon transparencë nga institucionet përgjegjëse për mënyrën se si janë përdorur paratë.

Ai shprehet se është banor i zonës dhe se është i gatshëm të vërë në dispozicion vendndodhjen dhe numrin e telefonit, për t’i shoqëruar përfaqësuesit e institucioneve në terren dhe për t’u treguar nga afër situatën.

Përmes këtij denoncimi, Piranjat News i drejtohet Bashkisë Dimal dhe institucioneve përgjegjëse për të marrë një përgjigje mbi pretendimet e banorit dhe fondet e përmendura.

Ku shkuan 800 milionë lekët e pretenduara dhe kur do të marrë zgjidhje problemi i rrugës në Çukalat?/ piranjat news