Trump “tërheq” Vancen nga negociatat me Iranin

Presidenti amerikan Donald Trump ka vendosur të largojë zëvendëspresidentin JD Vance nga përpjekjet diplomatike për arritjen e një marrëveshjeje me Iranin, duke sinjalizuar se Uashingtoni nuk e sheh më të nevojshme vazhdimin e negociatave me Teheranin.

Vendimi u bë publik përmes një postimi të Trump në rrjetin social Truth Social, ku presidenti amerikan deklaroi se SHBA-të nuk kanë më nevojë për një marrëveshje me Iranin.

“Ne nuk kemi nevojë për një marrëveshje me Iranin. Ato ditë kanë kaluar prej kohësh. Ne kemi paratë e tyre, qindra miliarda dollarë, dhe kemi edhe Ngushticën e Hormuzit”, shkroi Trump, duke iu referuar kontrollit amerikan mbi situatën në këtë korridor të rëndësishëm detar.

Në të njëjtin postim, Trump bëri të ditur se i kishte kërkuar Vance të përqendronte të gjithë vëmendjen te hetimi i rasteve të pretenduara të krimit dhe korrupsionit në qytetet dhe shtetet e drejtuara nga demokratët në SHBA.

Lëvizja vjen vetëm një ditë pasi The Wall Street Journal raportoi se Vance po shqyrtonte mundësinë e zhvillimit të bisedimeve të drejtpërdrejta me një zyrtar të lartë iranian për të gjetur një rrugëdalje diplomatike nga konflikti.

Vance kishte qenë një nga figurat kryesore të administratës amerikane në negociatat me Teheranin. Ai drejtoi delegacionin amerikan në bisedimet e zhvilluara në Pakistan në muajin prill, të cilat çuan në një memorandum mirëkuptimi në qershor, por marrëveshja nuk arriti të qëndronte në fuqi.

Ndërkohë, administrata Trump ka vijuar presionin ndaj Iranit përmes bllokadës detare dhe sanksioneve ekonomike. Mbetet e paqartë nëse deklarata e fundit e presidentit amerikan nënkupton ndërprerjen e plotë të përpjekjeve diplomatike apo vetëm ndryshimin e strategjisë së Uashingtonit ndaj Teheranit.