Skandali i Nvidia-s, lidhjet e Alice Huang me rivalin kinez Huawei ngrenë dyshime të reja

Skandali që ka përfshirë gjigantin amerikan të teknologjisë Nvidia po merr një tjetër zhvillim, pas zbulimit të lidhjeve të biznesit të Alice Huang me kompani që bashkëpunonin me Huawei, rivalin kryesor të Nvidia-s në Kinë.

Sipas një hetimi të firmës private të inteligjencës Tesari, të publikuar nga CNBC, Huang kishte qenë bashkëpronare e kompanisë Shanghai Hexi, e cila në vitin 2021 bleu 27% të aksioneve të Shanghai Century Longteng. Kjo e fundit kontrollonte 50.1% të qendrës së të dhënave Shenzhen Yifeng Technology, klienti kryesor i së cilës ishte Huawei Cloud. Lidhjet vijonin edhe përmes bashkëshortit të saj, Kang Wei, i cili kishte themeluar Hexi dhe më pas mori një pozicion drejtues në Longteng. Ai ishte i pranishëm edhe në nënshkrimin e marrëveshjes me Huawei.

Alice Huang ka qenë gjithashtu drejtoreshë ekzekutive e kompanisë Megaspeed, me seli në Singapor, nga marsi deri në nëntor 2023. Sipas analistëve, kompania është kthyer në një prej blerësve më të mëdhenj të mikroçipave Nvidia në Azi, me blerje që vlerësohen në mbi 4 miliardë dollarë.

Këto zbulime kanë shtuar dyshimet për rolin e Huang në marrëdhëniet tregtare mes Nvidia-s dhe kompanive kineze. Megjithatë, deri tani nuk janë gjetur prova për transferimin e paligjshëm të çipave Nvidia drejt Huawei-t, ndërsa Pekini i ka mohuar akuzat për spiunazh.

Ndërkohë, skandali ka vënë nën presion edhe drejtuesin e Nvidia-s, Jensen Huang, i cili sipas raportimeve ka pranuar të dëshmojë me dyer të mbyllura para Kongresit amerikan deri më 26 nëntor. Ligjvënësit kërkojnë sqarime për lidhjet e kompanisë me Kinën dhe aktivitetin e Alice Huang.

Çështja ka shkaktuar gjithashtu tronditje në tregjet financiare, ku aksionet e Nvidia-s kanë pësuar rënie deri në 14% gjatë një seance tregtare. Hetimet vijojnë, ndërsa ende nuk është vërtetuar nëse Alice Huang vepronte për interesat e saj, të kompanive ku kishte pjesëmarrje apo në emër të Pekinit.