U përjashtua nga Policia e Shtetit pas konflikteve me qytetarët/ Polici problematik rikthehet në detyrë dhe qarkullon me makinën private me logon e Policisë!

Një denoncim ka mbërritur në redaksinë e Piranjat News lidhur me një punonjës të Policisë Bashkiake Berat, Qirjako Nazarko, i cili sipas denoncuesit është përjashtuar më herët nga Policia e Shtetit dhe më pas është emëruar në Policinë Bashkiake. Denoncuesi ngre shqetësime për disa konflikte të tij me qytetarë, ndërsa pamjet e siguruara nga Piranjat News tregojnë se punonjësi qarkullon me automjetin e tij personal, të pajisur me logon e Policisë Bashkiake Berat.

Sipas materialeve të mbërritura në redaksinë e Piranjat News, gjatë vitit 2025 dhe 2026 janë raportuar disa episode përplasjesh mes punonjësit dhe qytetarëve, përfshirë edhe përplasje fizike. Këto raste janë pjesë e shqetësimeve të ngritura nga denoncuesi, i cili kërkon verifikimin e tyre nga institucionet përgjegjëse. Por një tjetër çështje ngre pikëpyetje dhe kërkon shpjegim nga autoritetet.

Pamjet e siguruara nga Piranjat News tregojnë se polici përdor automjetin e tij personal, të pajisur me logon e Policisë Bashkiake Berat, me të cilin qarkullon në qytet.

Përdorimi i shenjave identifikuese të një institucioni publik në një automjet privat ngre pikëpyetje mbi ligjshmërinë dhe autorizimin për një veprim të tillë. Kush e ka lejuar vendosjen e logos? A është automjeti i autorizuar për këtë përdorim dhe mbi çfarë baze ligjore?

Piranjat News kërkon transparencë edhe për rikthimin e këtij punonjësi në detyrë, duke qenë se ndaj tij janë ngritur shqetësime dhe janë depozituar denoncime për konflikte me qytetarët. A janë marrë masa administrative apo disiplinore? A është verifikuar përdorimi i automjetit privat me logon e institucionit?

Qytetarët kanë të drejtë të informohen, ndërsa institucionet kanë detyrimin të sqarojnë nëse rregullat dhe ligji po zbatohen njësoj për të gjithë.