Studentët në Universitetin e Korçës kanë vijuar bojkotin e mësimit, në mbështetje të protestës studentore e ...
POLITIKE
U transferua nga paraburgimi i Durrësit në Fier, Veliaj: Rrëmbim policor që cenon të drejtat e mija
PiranjatPërditësimi i fundit 28 October 2026, 14:11
Erion Veliaj ka reaguar pas transferimit të tij nga paraburgimi i Durrësit drejt Fierit.
Në një deklaratë në rrjete sociale, ai e cilësoi veprimin si një “rrëmbim policor”, duke pretenduar se transferimi është kryer pa iu vënë në dispozicion akti që e urdhëron dhe pa iu komunikuar arsyet ligjore të vendimit.
Sipas Veliajt, si ai ashtu edhe avokati i tij kanë kërkuar të njihen me dokumentacionin përkatës, por kjo kërkesë është refuzuar.
Reagimi:
Sot, një grup punonjësish të Policisë së Burgjeve, të dërguar nga Drejtoria e Përgjithshme e Burgjeve, janë paraqitur në IEVP Durrës për të më transferuar në burgun e Fierit.
Pavarësisht kërkesave të përsëritura, si nga unë ashtu edhe nga avokati im, për t’u njohur me aktin që urdhëron transferimin dhe arsyet që e justifikojnë atë, na është refuzuar vënia në dispozicion e këtij dokumenti.
Një transferim i detyruar, pa më bërë të njohur aktin dhe arsyet ligjore mbi të cilat mbështetet, për mua përbën një rrëmbim policor dhe cenon rëndë të drejtat e mia.
Unë nuk kam dhënë pëlqimin për këtë transferim dhe kam kundërshtuar mënyrën se si po realizohet, pa transparencë dhe pa më mundësuar ushtrimin efektiv të të drejtave të mia ligjore.
I kërkoj publikisht Ministrit të Drejtësisë, Avokatit të Popullit dhe Komitetit Shqiptar të Helsinkit të ndërhyjnë urgjentisht, të verifikojnë arsyet dhe shkaqet e këtij transferimi politik.
