Zv/presidentja e Asamblesë Parlamentare të OSBE-së dënon dhunën ndaj protestuesve: Të hetohen abuzimet e policisë dhe të ndalet intimidimi i studentëve

Zv.presidentja e Asamblesë Parlamentare të OSBE-së dhe deputetja e Parlamentit austriak, Dr. Gudrun Kugler, ka reaguar për protestat studentore në Shqipëri, duke dënuar përdorimin e forcës ndaj protestuesve dhe duke kërkuar hetim të menjëhershëm e të pavarur për pretendimet për abuzime policore.

Në deklaratën e saj, Kugler thekson se protesta paqësore është një e drejtë themelore dhe se të rinjtë që kërkojnë llogaridhënie, luftë kundër korrupsionit dhe një të ardhme më të mirë në vendin e tyre meritojnë të dëgjohen, jo të përballen me forcën.

Ajo shprehet se raportimet për përdorim joproporcional dhe të paligjshëm të forcës ndaj protestuesve, përfshirë të rinj dhe të mitur, janë thellësisht shqetësuese. Po ashtu, deputetja austriake ngre shqetësimin për raportimet se studentët dhe familjarët e tyre po gjobiten dhe intimidohen për ushtrimin e të drejtave të tyre.

Kugler kërkon që të gjitha këto pretendime të hetohen plotësisht dhe në mënyrë të pavarur, në përputhje me standardet ndërkombëtare të të drejtave të njeriut, ndërsa përgjegjësit të mbajnë përgjegjësi.

“Dhuna dhe sulmet ndaj njerëzve dhe pronës nuk kanë vend në një demokraci dhe duhet të dënohen”, thekson ajo, duke nënvizuar se edhe aktet që cenojnë lirinë e shprehjes dhe të tubimit janë në kundërshtim me standardet moderne të të drejtave të njeriut.

Zv.presidentja e Asamblesë Parlamentare të OSBE-së u bën thirrje autoriteteve shqiptare dhe policisë t’i japin fund çdo forme intimidimi ndaj protestuesve dhe të zhvillojnë një dialog të vërtetë me studentët, pedagogët dhe shoqërinë civile. Ndërkohë, ajo u kërkon protestuesve të tregojnë vetëpërmbajtje dhe të vijojnë të qëndrojnë paqësorë.

Në reagimin e saj, Kugler vëren se protestat në Shqipëri janë shndërruar në një lëvizje më të gjerë kundër qeverisë së kryeministrit Edi Rama, ku në qendër janë akuzat për korrupsion, kërkesat për përmirësimin e arsimit dhe më shumë mundësi për të ardhmen profesionale.

Ajo përmend gjithashtu përplasjet gjatë protestave dhe përdorimin nga policia të plumbave të gomës, gazit lotsjellës dhe ujëhedhësve, ndërsa rikujton se për të shtunën, më 7 nëntor 2026, është njoftuar një tjetër protestë masive.

Në përfundim, Kugler thekson se e ardhmja e Shqipërisë qëndron në rrugën demokratike dhe europiane, e cila kërkon sundimin e ligjit, respektimin e të drejtave themelore dhe një luftë serioze kundër korrupsionit.

Deklarata e plotë e Gudrun Kugler:

“Protesta paqësore është një e drejtë themelore, e cila duhet të respektohet plotësisht. Të rinjtë që dalin në rrugë për të kërkuar llogaridhënie, fundin e korrupsionit dhe një të ardhme në vendin e tyre meritojnë të dëgjohen, jo të përballen me forcën. I bëj thirrje protestuesve të vazhdojnë të tregojnë vetëpërmbajtje.

Raportimet për përdorim joproporcional dhe të paligjshëm të forcës ndaj protestuesve, përfshirë të rinj dhe të mitur, janë thellësisht shqetësuese. Kemi marrë gjithashtu raportime se studentët dhe familjet e tyre po gjobiten dhe po intimidohen për ushtrimin e të drejtave të tyre, gjë që është po ashtu e papranueshme. Të gjitha këto pretendime duhet të hetohen menjëherë, në mënyrë të plotë dhe të pavarur, duke respektuar standardet ndërkombëtare të të drejtave të njeriut. Përgjegjësit duhet të mbajnë përgjegjësi.

Dhuna dhe sulmet ndaj njerëzve dhe pronës nuk kanë vend në një demokraci dhe duhet të dënohen. Aktet që cenojnë lirinë e shprehjes dhe lirinë e tubimit nuk janë në përputhje me standardet moderne të të drejtave të njeriut.

Shqetësimet e ngritura nga protestuesit meritojnë përgjigje të besueshme. E ardhmja e Shqipërisë qëndron në rrugën demokratike dhe europiane, dhe kjo rrugë kërkon sundimin e ligjit, lirinë e tubimit dhe një luftë serioze kundër korrupsionit.

U bëj thirrje autoriteteve shqiptare, të gjitha palëve të përfshira dhe protestuesve të tregojnë vetëpërmbajtje dhe të veprojnë me drejtësi e në mënyrë paqësore. I bëj thirrje policisë t’i japë fund çdo forme intimidimi ndaj protestuesve dhe të zhvillojë një dialog të vërtetë me studentët, pedagogët dhe shoqërinë civile.”