14 të pushkatuar pa gjyq, krimi komunist në prag të çlirimit të Tiranës

Pesë ditë përpara çlirimit të Tiranës, ndërsa Lufta e Dytë Botërore po shkonte drejt fundit në Shqipëri, njësitet guerile komuniste të kryeqytetit kishin nisur eliminimin e njerëzve që pushteti i ardhshëm i konsideronte kundërshtarë. Më 12 nëntor 1944, 14 qytetarë, mes tyre gazetarë, botues, tregtarë, ushtarakë dhe patriotë të njohur, u ekzekutuan pa gjyq.

Sot, 82 vite më vonë, kjo ngjarje mbetet një nga episodet më të errëta të vendosjes së pushtetit komunist në Shqipëri. Mes viktimave ishin Ismail Agë Petrela, vëllezërit Mumtaz e Vesim Kokalari, gazetari Nebil Çika, Reshat Stërmasi, Muharrem Lleshi, Rifat Tërshana dhe tregtari durrsak Lluka Xhumari.

Mumtaz dhe Vesim Kokalari, vëllezërit e shkrimtares Musine Kokalari, ishin botuesit e shtëpisë “Mesagjeritë Shqiptare”, e cila kishte kontribuar në përhapjen e letërsisë dhe kulturës shqiptare. Mes të vrarëve ishte edhe Nebil Çika, një nga emrat e njohur të gazetarisë shqiptare, drejtues i gazetës “Arbëria” dhe revistës “Minerva”.