Abuzoi s*ksualisht me 70-vjeçaren dhe i vodhi lekët, zbardhen detaje të reja nga ngjarja e rëndë

Detaje të reja janë zbardhur nga ngjarja e rëndë e ndodhur në fshatin Akërni të Vlorës. Mësohet se një 70-vjeçare është dhunuar dhe grabitur në banesën e saj. Sipas njoftimit të Policisë, dyshohet se ngjarja ka ndodhur më 26 shtator, ku 43-vjeçari Fatos Ymeri që banonte në të njejtin pallat me të moshuarën ka trokitur në derën e saj dhe pasi dera është hapur e ka qëlluar me sëpatë në kokë.

Si pasojë e goditjes e moshuara ka humbur ndjenjat, ndërsa Ymeri është futur në banesë dhe ka marrë rreth 70 mijë lekë që ndodheshin aty. Policia ngre dyshimet se para se të largohej nga banesa 43-vjeçari ka abuzuar seksualisht me të moshuarën. Pas denoncimit të rastit, policia ka sekuestruar sëpatën si material prove, ndërsa Ymeri është shpallur në kërkim. Hetimet për zbardhjen e plotë të rrethanave të ngjarjes vijojnë, teksa ka aludime se autori është përdorues i lëndëve narkotike.