Tony Blair ka bërë thirrje që Britania të angazhohet për t'u rikthyer në Bashkimin Evropian brenda dekadës së ardhshme...
AKTUALITET
Detaje nga seanca me dyer të mbyllura, ja çfarë deklaroi Vlora Hyseni në SPAK!
PiranjatPërditësimi i fundit 24 Shtator 2026, 21:35
Gazetarja Anila Hoxha ka sjellë detaje nga seanca me dyer të mbyllura ndaj ish-drejtoreshës së SHISH, Vlora Hyseni, e cila u paraqit në SPAK e shoqëruar nga avokati i saj.
Hoxha tha se seanca zgjati rreth 1 orë e 3 minuta dhe se Hyseni ka mohuar akuzat, ndërsa ka kërkuar që telefoni i saj të ekzaminohet nga agjenci partnere jashtë Shqipërisë. Gazetarja solli gjithashtu detaje nga deklarimet e të dyshuarve të tjerë dhe momentet pas përfundimit të seancës, kur Hyseni u largua në heshtje nga ambientet e SPAK.
“Seanca ishte njoftuar ditën e djeshme dhe 5 minuta para orës 12, Hyseni kaloi pragun bashkë me avokatin e saj.
Ajo që ka ndodhur është mjaft e rezervuar. Burime jozyrtare, por shumë të besueshme pranë SPAK, që vendosën të flasin në rrugë anonime, thanë se prokurorët kanë vijuar me leximin e të dhënave dhe renditjen e fakteve të dyshuara që mbeten mjaft sekrete, që lidhet me sekretin sa i takon detyrës që ka mbajtur.
Hyseni ka hedhur poshtë akuzat, ka kërkuar ekspertim të telefonit, që nuk duhet të kryhet në Shqipëri, por nga agjencitë partnere. Kjo kërkesë duket e pabazuar, përsa ekspertimet e kërkuara prej saj bëhen në laboratorin e ndërtuar enkas në këtë prokurori të posaçme. Se përse e ka kërkuar këtë, e di vetëm Hyseni. Ka qenë i sekuestruar telefoni, sa kohë ka kërkuar që të këqyret jo nga Shqipëria. Ka pretenduar se nuk ka dalë asnjë dokument i klasifikuar prej saj si drejtoreshë e SHISH. Vetëm këto dy deklarata më janë konfirmuar. SPAK, kur shpërndau vendimmarrjen, rikujtoi sërish se ndalohet shpërndarja e çdo të dhëne nga kjo seancë.
Herët në mëngjes, nga policia u soll edhe Vlora Hyseni, që është në arrest shtëpiak, ishin dhe dy të dyshuarit e tjerë.
Emro Suljemani, i punësuar në një subjekt privat, kamarier, ai është shfajësuar dhe ka pyetur gjykatën se çfarë krimi kishte kryer, duke thënë se e njihte Agasin, pasi është nga qyteti i Durrësit dhe se e kishte ndihmuar me ushqim. Edhe përgjegjësi në laboratorit, Kalloshi, ia ka lënë fajin kujtesës, duke thënë se nuk mban mend të ketë dërguar informacione në telefonin e Agasit.
Të gjithë gazetarët që raportojnë për çështjet e drejtësisë, në ushtrim të detyrimit për t’i bërë publike të vërtetën, ngelën pa fjalë, pasi gati-gati ishte e pabesueshme se çfarë po thoshte ish-drejtuesja e SHISH për gazetaren dhe kolegen Klodiana Lala, direkt u kuptua që ishte një fjali shantazhi dhe kërcënimi.
Ne menjëherë pas seancës me dyer të mbyllura në adresë të Hysenit, që zgjati gati 1 orë e 3 minuta, qëndruam në vendet tona, ne vazhduam t’i drejtonim pyetje që i takojnë dhe janë në fashën e detyrës që ka mbajtur dhe në lidhje me dyshimet që ka zyrtarizuar SPAK deri tani. Ajo që morën gazetarët ishte largimi i Vlora Hysenit në heshtje”, tha Anila Hoxha.
