Masa e sigurisë "arrest në shtëpi" dhe "pezullimi nga detyra"/ Mediat ndërkombëtare jehonë, raportojnë për goditjen ndaj ish-shefes së SHISH

Masa e sigurisë "arrest në shtëpi" dhe pezullimi nga detyra i ish-drejtoreshës së Shërbimit Informativ të Shtetit, Vlora Hyseni, ka marrë jehonë edhe në mediat ndërkombëtare. Gazeta italiane ANSA ka raportuar për rastin, duke shkruar se është lëshuar mandat arresti për drejtoreshën e shërbimeve sekrete shqiptare, Vlora Hyseni.

Sipas ANSA-s, masa është dhënë nga GJKKO në kuadër të hetimeve ndaj sipërmarrësit Ergys Agasi, i lidhur me hetimet për korrupsion në tenderët e AKSHI-t. ANSA raporton se urdhri nuk u ekzekutuar menjëherë, pasi Hyseni rezultonte jashtë vendit, por disa orë më vonë ajo u ndalua në pikën kufitare të Morinës.

Agjencia italiane shkruan se ajo dyshohet për zbulim të sekreteve shtetërore, ndërsa në kuadër të të njëjtit hetim është kontrolluar edhe banesa e ish-drejtorit të Policisë së Shtetit, Ilir Proda.

Është lëshuar një urdhër arresti ndaj drejtoreshës së Shërbimeve Sekrete shqiptare, Vlora Hyseni, me origjinë nga Kosova. Masa e sigurisë është lëshuar nga Gjykata e Posaçme Kundër Korrupsionit dhe Krimit të Organizuar (GJKKO), në kuadër të një hetimi ndaj biznesmenit Ergys Agasi, i përfshirë në një rast korrupsioni lidhur me tenderët e Agjencisë Shtetërore për Sistemet Informatike.

Agasi, i cili kishte qenë në arrati për disa muaj, u arrestua gushtin e kaluar. Urdhri i arrestit ndaj Hysenit nuk është ekzekutuar, pasi ajo rezulton të jetë jashtë vendit. Sipas mediave, ajo dyshohet për “zbulim të sekreteve shtetërore”.

Hetimi ka përfshirë edhe ish-drejtorin e përgjithshëm të Policisë së Shtetit, Ilir Proda, banesa e të cilit është kontrolluar dhe nga i cili është sekuestruar edhe telefoni. Ndaj tij nuk është vendosur asnjë masë sigurie. Në pranga ka përfunduar ndërkohë drejtuesi i laboratorit të policisë shkencore dhe një kriminalist. Për këtë çështje ende nuk ka një komunikatë zyrtare nga Prokuroria e Posaçme, e cila ka zhvilluar hetimet.