VIDEO/ Arratisje spektakolare me litar e të arrestuarit

Një 74-vjeçar, i dënuar për rrëmbim, arratiset nga arresti shtëpiak në Argjentinë duke zbritur me litar nga ballkoni

Një italian 74-vjeçar, i shpallur fajtor për një rrëmbim të kryer nga një grup militant i ekstremit të majtë në vitet 1970, është arratisur ndërsa ndodhej në arrest shtëpiak në Argjentinë dhe aktualisht është në arrati.

 
Leonardo Bertulazzi përdori një pajisje sigurie (rripa) për të zbritur me litar nga ballkoni i katit të pestë në kryeqytetin Buenos Aires, shkruajnë mediat e huaja, përcjell Telegrafi.

Arratisja e tij nuk u diktua menjëherë, pasi ai kishte manipuluar pajisjen elektronike që mbante në kyçin e këmbës; pajisja vazhdonte të transmetonte të dhëna për temperaturën e trupit edhe pasi ai e kishte hapur atë me forcë dhe ishte larguar.

Bertulazzi kishte kaluar tashmë dekada si i arratisur, pasi ishte dënuar në mungesë në Itali për rrëmbimin e inxhinierit detar italian, Pietro Costa, në vitin 1977.

Ai priste ekstradimin drejt Italisë dhe mbahej nën vëzhgim nga Ministria e Sigurisë e Argjentinës përmes një pajisjeje në kyçin e këmbës, e cila regjistron temperaturën e trupit dhe lëvizjet e personit që e mban.

Autoritetet u bënë dyshuese kur vunë re se pajisja kishte mbetur e palëvizshme.

Kur hynë në apartamentin në katin e pestë, në qendër të Buenos Airesit, Bertulazzi nuk ndodhej më aty, por pajisja elektronike kishte mbetur në vend.

Duke pasur parasysh të kaluarën e Bertulazzit me grupin gueril marksist "Brigadat e Kuqe" (Red Brigades) dhe aftësitë e tij në prodhimin e bombave, policia thirri ekspertë të lëndëve plasëse, nga frika se pajisja mund të ishte manipuluar për të shpërthyer, raporton gazeta argjentinase "Clarín".

Megjithatë, ekspertët zbuluan se, ndonëse Bertulazzi e kishte manipuluar pajisjen, ai e kishte bërë këtë vetëm për të shmangur aktivizimin e alarmit në momentin që do ta hiqte atë.