Qeveria disponon 12 mld lekë apo rreth 120 mln euro fonde të pashpenzuara në llogarinë unike pranë Bankës së Shqipëris...
BOTA
Emigranti venezuelian qëllohet nga agjenti i ICE-së, akuzohet për rezistencë ndaj oficerit federal
PiranjatPërditësimi i fundit 30 Shtator 2026, 08:11
Një 28-vjeçar venezuelian, i cili u qëllua nga një agjent i Shërbimit të Emigracionit dhe Doganave (ICE) në Austin të Teksasit, është akuzuar nga autoritetet amerikane për sulm dhe rezistencë ndaj një oficeri federal. Wilber Rafael Garces Perez u paraqit të martën në gjykatën federale, pasi Departamenti amerikan i Drejtësisë ngriti ndaj tij një akuzë për sulm, rezistencë, ndërhyrje dhe pengim të një oficeri federal. Nëse shpallet fajtor, ai përballet me deri në 20 vite burg. Një seancë për paraburgimin e tij është caktuar për 2 tetor.
Ngjarja ndodhi më 20 shtator në veri të Austin, kur agjentët e ICE ndaluan automjetin që drejtonte Garces Perez, i cili punonte si shpërndarës. Sipas dokumenteve të gjykatës, agjentët e kishin identifikuar atë si person ndaj të cilit ishte lëshuar një urdhër përfundimtar dëbimi.
Sipas versionit të prokurorisë, Garces Perez u tregoi agjentëve patentën e drejtimit, por më pas kur iu kërkua të ndalonte automjetin dhe të dilte prej tij, ai mbylli xhamin dhe u largua. Autoritetet pretendojnë se gjatë largimit pasqyra anësore e automjetit goditi një prej agjentëve. Më pas, gjatë ndjekjes, një tjetër agjent qëlloi ndaj tij, duke e plagosur.
Megjithatë, avokatët e Garces Perez kundërshtojnë versionin e autoriteteve. Vetë 28-vjeçari ka deklaruar se nuk po përpiqej të arratisej, por po kërkonte një vend të sigurt ku të parkonte. Ai pretendon se automjeti i tij u godit nga një makinë e agjentëve të ICE dhe se më pas u qëllua.
Rasti ka marrë vëmendje të madhe në Austin, ndërsa mënyra se si u zhvillua ndalimi dhe përdorimi i armës po hetohen nga autoritetet. Dokumentet e gjykatës tregojnë se agjenti që qëlloi Garces Perez nuk kishte kamerë trupore në momentin e incidentit, ndërsa agjenti tjetër kishte një të tillë, por nuk ishte në pozicion për të regjistruar momentin e të shtënës. Garces Perez u dërgua fillimisht në spital pas të shtënës dhe më pas u rikthye në paraburgimin e ICE. Sipas avokatit të tij, plumbi ka mbetur ende në trupin e tij.
Ndërkohë, Zyra e Prokurorit të Qarkut Travis County i ka kërkuar Departamentit të Sigurisë Kombëtare dhe ICE që të ndalojnë përkohësisht procedurat e dëbimit ndaj tij, duke argumentuar se prania e Garces Perez në SHBA është e nevojshme për hetimin e incidentit. Departamenti i Drejtësisë thekson se akuzat janë ende pretendime dhe se Garces Perez konsiderohet i pafajshëm derisa fajësia të provohet në gjykatë.
