Diaspora shqiptare arrin në 2.26 milionë persona, 77% janë në moshë pune

Gati gjysma e shtetasve shqiptarë jetojnë jashtë vendit, ndërsa pjesa dërrmuese e diasporës përbëhet nga persona në moshë pune.

Sipas të dhënave më të fundit të INSTAT, diaspora shqiptare e krijuar pas viteve 1990 vlerësohet në 2,256,346 persona në vitin 2025, duke përfaqësuar rreth 49% të totalit të shtetasve shqiptarë.

Shifrat janë përfshirë në Profilin Kombëtar të Migracionit 2025, të miratuar nga Ministria e Punëve të Brendshme, dhe tregojnë përmasat e emigracionit shqiptar, si dhe peshën e madhe të popullsisë ekonomikisht aktive që jeton jashtë vendit.

Nga 2.26 milionë shqiptarë të diasporës, rreth 77% i përkasin grupmoshës 15–64 vjeç. Kjo do të thotë se afërsisht 1.74 milionë persona janë në moshë pune, një shifër që tregon potencialin e konsiderueshëm njerëzor dhe ekonomik të përqendruar jashtë Shqipërisë.

Përmasat e diasporës janë pothuajse të krahasueshme me numrin e popullsisë rezidente në Shqipëri, e cila sipas Censusit 2023 ishte 2,363,314 banorë. Megjithatë, dy treguesit u përkasin periudhave të ndryshme dhe bazohen në metodologji të ndryshme statistikore.

Diaspora dominohet nga të rinjtë dhe personat në moshë pune

Struktura demografike tregon se emigracioni shqiptar ka kryesisht karakter ekonomik dhe familjar.

Fëmijët e grupmoshës 0–14 vjeç përbëjnë rreth 18% të diasporës, ndërsa personat mbi 65 vjeç zënë vetëm 5%. Kjo shpërndarje tregon se jashtë vendit nuk jetojnë vetëm individë të larguar për punë, por edhe familjet e tyre, përfshirë fëmijët.

Sipas gjinisë, diaspora përbëhet nga 1,177,529 meshkuj, ose 52.2% e totalit, dhe 1,078,817 femra, që përfaqësojnë 47.8%.

Pesha e lartë e grupmoshave aktive lidhet me mundësitë e punësimit dhe të ardhurave në vendet pritëse, ndërsa prania e konsiderueshme e fëmijëve tregon rëndësinë që ka marrë migracioni familjar.

Italia dhe Greqia mbeten destinacionet kryesore

Raporti evidenton se Italia dhe Greqia vazhdojnë të jenë dy destinacionet tradicionale të emigracionit shqiptar, por shpërndarja gjeografike e diasporës po zgjerohet gradualisht.

Një prani në rritje e shqiptarëve vërehet edhe në Gjermani, si dhe në vende të Evropës Veriore dhe Qendrore. Sipas raportit, ky diversifikim lidhet me ndryshimet në tregjet evropiane të punës dhe mundësitë ekonomike që ofrojnë vendet pritëse.

Të dhënat e Eurostat tregojnë se gjatë vitit 2024, vendet e Bashkimit Evropian lëshuan rreth 79 mijë leje të para qëndrimi për shtetasit shqiptarë, 5.5% më shumë se një vit më parë.

Bashkimi familjar përbënte 47.6% të lejeve të para të qëndrimit, ndërsa punësimi 29.1%. Këto të dhëna tregojnë se emigracioni po mbështetet jo vetëm te kërkimi i mundësive të punës, por edhe te vendosja e familjeve shqiptare jashtë vendit. /ekofin.al