Egnatia arratiset në krye, Skënderbeu befason Dinamon dhe Partizani mbetet në fund, ja si ndryshon renditja e Superiores

Java e 11-të solli ndryshime të rëndësishme në klasifikim, veçanërisht në pjesën e sipërme dhe në luftën për mbijetesë.

Java e 11-të solli ndryshime të rëndësishme në klasifikim, veçanërisht në pjesën e sipërme dhe në luftën për mbijetesë. Egnatia është skuadra që përfiton më shumë, pasi pas triumfit ndaj Vorës shkon në kuotën e 27 pikëve dhe e thellon diferencën me ndjekësit.

Rrogozhinasit vijojnë të konfirmojnë dominimin në kampionat, duke u shkëputur me 7 pikë nga Teuta, që pavarësisht humbjes ndaj Tiranës mbetet në vendin e dytë me 20 pikë.

Një hap pas bën Dinamo City. Blutë u mposhtën 0-2 në shtëpi nga Skënderbeu, duke mbetur në kuotën e 17 pikëve dhe në vendin e tretë. Nga ana tjetër, korçarët marrin një fitore me shumë vlerë, ngjiten në 14 pikë dhe barazojnë me AF Elbasanin, duke hyrë fuqishëm në garën për zonën e sipërme të tabelës.

Tirana përfiton nga fitorja 1-0 ndaj Teutës dhe ngjitet në vendin e katërt me 15 pikë, ndërsa Elbasani zbret në vendin e gjashtë pas humbjes në Shkodër. Vllaznia, falë triumfit minimal ndaj verdhebluve, shkon në 12 pikë dhe barazon me Vorën, që u dorëzua përballë Egnatias.

Në fundin e klasifikimit, Partizani merr një fitore jetike 1-0 ndaj Laçit, por tri pikët nuk mjaftojnë për të dalë nga vendi i fundit. Të kuqtë shkojnë në 10 pikë, ndërsa Laçi mbetet me 11, duke e bërë edhe më të fortë betejën për mbijetesë.

Pas 11 javësh, diferenca mes vendit të pestë dhe atij të fundit është vetëm 4 pikë. Një kampionat ku, përveç Egnatias që po krijon një shkëputje të konsiderueshme, pjesa tjetër e skuadrave mbetet në një garë të hapur dhe me shumë pak hapësirë për gabime.

Top Channel