Milani e nis me spektakël dhe e mbyll me ankth, Genoa e tremb në fund

Cisse dhe Pulisic i japin avantazhin e dyfishtë skuadrës kuqezi që në 19 minutat e para, por një gol i vendasve në fund e kthen sfidën në një betejë deri në sekondat e fundit. Milani vazhdon të mbajë ritmin në majën e Serie A. Skuadra kuqezi fitoi 2-1 në transfertën ndaj Genoas, në një ndeshje me dy tablo të ndryshme: dominim dhe efikasitet në pjesën e parë, më pas vështirësi dhe ankth deri në përfundim.

Vendasit patën mundësinë të surprizonin që në nisje, por Milani mori shpejt kontrollin e lojës. Në minutën e 13-të, presioni i lartë rezultoi vendimtar. Pulisic fitoi topin në gjysmëfushën kundërshtare, Rabiot vijoi aksionin dhe Cisse e finalizoi me një goditje të ulët nga jashtë zonës, duke kaluar kuqezinjtë në avantazh.

Gjashtë minuta më vonë erdhi edhe goditja e dytë. Një pasim i gabuar në mbrojtjen e Genoas i dha mundësinë Gonçalo Ramos të shërbente për Pulisic, i cili nga pranë portës e dërgoi topin në rrjetë. Milani kishte krijuar një epërsi të konsiderueshme dhe shkoi në dhomat e zhveshjes me avantazhin 2-0, pavarësisht përpjekjeve të vendasve për të reaguar.

Pas pushimit, situata u komplikua. Një episod në minutën e 52-të, ku Rabiot u rrëzua gjatë një aksioni sulmues, shkaktoi protesta të forta nga kampi kuqezi. Vendimet e gjyqtarit sollën edhe përjashtimin e tre pjesëtarëve të stafit teknik të Milanit. Ndeshja humbi ritmin, ndërsa skuadrat u përpoqën të ndryshonin situatën përmes zëvendësimeve.

Kur fitorja dukej e sigurt, Genoa riktheu emocionet. Në minutën e 89-të, Ellertsson përfitoi nga hapësira e krijuar përpara mbrojtjes së Milanit dhe lëshoi një goditje të fuqishme nga distanca, duke mposhtur Maignan. Vendasit u hodhën në sulm në minutat shtesë, por kuqezinjtë arritën të përballonin presionin. Vërshëllima përfundimtare konfirmoi fitoren 2-1 të Milanit, që shkon në kuotën e 24 pikëve dhe vazhdon të qëndrojë në krye të kampionatit. Për Genoan, që mbetet me 13 pikë, kjo humbje ndërpret serinë e rezultateve pozitive.