EMRI/ I riu shqiptar “tap” sulmon 5 efektivë policie në Maltë dhe i ngrihen 9 akuza

Një 25-vjeçar shqiptar është lënë në paraburgim të dielën, pasi akuzohet se i ka rezistuar me dhunë arrestimit, kur policia e kapi duke drejtuar automjetin me një nivel alkooli shtatë herë më të lartë se kufiri i lejuar.
Iridjon Zotaj, punëtor në sektorin e ndërtimit, i cili jeton në Luqa të Maltës, u përball me nëntë akuza pas një incidenti të ndodhur në rrugën Triq l-Imdina, në Qormi, në orët e para të 22 nëntorit.
Mes akuzave janë fyerja, kërcënimi dhe sulmi ndaj pesë efektivëve të policisë gjatë ushtrimit të detyrës, kundërshtimi me dhunë i arrestimit, drejtimi i automjetit pa leje të vlefshme dhe pa siguracion ndaj palëve të treta, si dhe drejtimi i makinës nën efektin e alkoolit.
Ai akuzohet gjithashtu për dehje në publik, prishje të qetësisë publike dhe fyerje e kërcënim ndaj efektivëve përtej kufijve të provokimit.
Zotaj është deklaruar i pafajshëm për të gjitha akuzat.
Njëri prej avokatëve të tij, Alexandr Boichuk, kërkoi lirimin me kusht, duke argumentuar se klienti i tij jetonte prej tre vitesh në Maltë, kishte kartë identiteti vendase dhe punonte me kohë të plotë në ndërtimin e rrugëve.
Sipas avokatit, mbajtja në paraburgim mund të rrezikonte vendin e punës dhe të ardhurat e të riut.
Avokati tjetër, Mario Buttigieg, vuri në dukje se disa prej akuzave kishin të bënin me shkelje të rregullave të qarkullimit rrugor.
Por inspektori James Mallia, një prej efektivëve të pranishëm në vendngjarje, kundërshtoi këtë argument, duke theksuar se incidenti nuk mund të konsiderohej thjesht një seri shkeljesh të Kodit Rrugor.
Ai nënvizoi se kundërshtimi me dhunë i arrestimit dënohet me burgim nga një deri në katër vjet.
Inspektori theksoi gjithashtu se Zotaj kishte drejtuar automjetin me një nivel alkooli shtatë herë mbi kufirin e lejuar. Norma ligjore për drejtuesit e automjeteve është 0.5 gramë për litër gjak.
Sipas tij, e gjithë ngjarja mund të ishte shmangur nëse 25-vjeçari do t'u ishte bindur urdhrave të policisë, në vend që të reagonte me dhunë.
Nga ana tjetër, Boichuk theksoi se, fatmirësisht, asnjëri prej pesë efektivëve nuk kishte pësuar lëndime gjatë përplasjes, madje as dëmtime të lehta.
Megjithatë, ky argument nuk e bindi magjistraten Donatella Frendo Dimech.
Ajo deklaroi se shqetësimi i gjykatës nuk lidhej me faktin nëse efektivët ishin lënduar apo jo, por me rezultatin e testit të alkoolit, i cili tregonte se Zotaj kishte qenë në timon me një nivel shtatë herë mbi kufirin e lejuar.
Sipas magjistrates, kjo përbënte një tregues se ai mund të ishte rrezik për shoqërinë.
Gjithashtu, ajo vuri në dyshim nëse 25-vjeçari do t'u përmbahej kushteve të vendosura nga gjykata për lirimin me kusht, kur dyshohet se nuk kishte zbatuar as urdhrat e policisë.
Magjistratja vuri në dukje se as më pak se pesë efektivë policie nuk kishin arritur ta vinin nën kontroll të akuzuarin. Kjo, sipas saj, nuk i jepte gjykatës besim se ai do të respektonte kushtet e vendosura në rast lirimi.
Për këtë arsye, gjykata vendosi t'i refuzojë Iridjon Zotajt kërkesën për lirim me kusht.
Prokuroria u përfaqësua nga inspektori James Mallia, ndërsa në mbrojtje të 25-vjeçarit u paraqitën avokatët Alexandr Boichuk dhe Mario Buttigieg. /PiranjatNews/
Lexo edhe
AKTUALITET
EMRI- Plagosja me thikë në Korçë/ Zbardhet dëshmia e 30-vjeçarit

Plagosje me thikë në Korçë

U ndoq nga 6 patrulla dhe u kap pas arratisë së ‘çmendur’ me makinë, 33-vjeçari shqiptar i lirë pas disa orësh

“Më gjuajtën dhe më gjobitën 5 mln lekë”/ Rrëfimi i adoleshentit të shoqëruar në protestë: S’më frikësojnë!

“The Sun”: 30 shqiptarë u dënuan për trafik droge vetëm në 1 muaj





