Katy Perry drejt zbulimit të sekreteve të martesës me Russell Brand, 15 vite pas ndarjes së tyre

- Këngëtarja amerikane Katy Perry po shqyrton mundësinë për të treguar publikisht detaje të panjohura nga martesa e saj me aktorin dhe komedianin britanik Russell Brand, gati 15 vite pas ndarjes së tyre. Perry thuhet se është në diskutime për realizimin e një autobiografie dhe një serie dokumentarësh, ku në fokus do të jetë martesa e tyre 14-mujore, një periudhë që njerëz pranë këngëtares e përshkruajnë si veçanërisht të vështirë.

Sipas raportimeve nga mediat e huaja, planet e saj vijnë pas vendimit të gjykatës britanike, e cila më 5 nëntor shpalli Russell Brand fajtor për një përdhunim dhe tri sulme seksuale ndaj katër grave. Aktori është liruar nga disa akuza të tjera, ndërsa vendimi për dënimin e tij pritet të shpallet më 9 nëntor.

Sipas informacioneve të publikuara, përfaqësuesit e këngëtares kanë zhvilluar diskutime me platforma të mëdha transmetimi, përfshirë Netflix dhe Hulu. Megjithatë, deri tani nuk është konfirmuar asnjë marrëveshje zyrtare. Katy Perry dhe Russell Brand u njohën në vitin 2009 dhe u martuan në Indi në tetor të vitit 2010. Martesa e tyre zgjati vetëm 14 muaj, pasi në dhjetor 2011 aktori i komunikoi këngëtares vendimin për t'u ndarë.

Në një intervistë të mëvonshme, Perry kishte folur për vështirësitë e marrëdhënies, duke treguar se ish-bashkëshorti ishte bërë kontrollues dhe e kishte pasur të vështirë të pranonte suksesin e saj profesional. Ajo kishte lënë gjithashtu të kuptohej se kishte mësuar diçka të rëndësishme pas ndarjes, por kishte zgjedhur të mos e bënte publike.

"Pastaj mësova të vërtetën e vërtetë, të cilën nuk mund ta zbuloj domosdoshmërisht, sepse e mbaj të mbyllur në kasafortën time për një ditë të keqe", ishte shprehur këngëtarja.

Perry nuk ka reaguar ende zyrtarisht për planet e mundshme të librit dhe dokumentarit. Nëse projekti realizohet, ai pritet të sjellë një rrëfim më të detajuar për një nga periudhat më të vështira të jetës së saj personale.