“Kjo është madhështia e Fenerbahces”, Vedat Muriqi reagon pas golit ndaj Liverpoolit

Sulmuesi Vedat Muriqi thotë se iu treguan Evropës sa e madhe është Fenerbahce me fitoren ndaj Liverpoolit.

 Skuadra turke përmbysi rezultatin nga 1-2 në 3-2, me Muriqin që shënoi golin e fitores, vetëm disa minuta pasi u inkuadrua në vendin e Romelu Lukakut.

Pas ndeshjes, Muriqi i ka falënderuar tifozët dhe shpreson se ky triumf të jetë “pikë kthese” për Fenerin.

 “Jam shumë i lumtur. Ky gol është dhuratë për tifozët. Po kalojmë disa kohë të vështira. Iu treguam sa e madhe është Fenerbahce”.

 “Të gjithë e ndjenë këtë, e nisëm ndeshjen jashtëzakonisht mirë. Kishim një goditje në shtyllë, pranuam një gol të pafat, por dolëm të suksesshëm, u rikthyem. Kjo është madhështia e Fenerbahces. Sinqerisht i falënderoj të gjithë. Shpresoj që kjo fitore të jetë pikë kthese”, shtoi Muriqi.

Muriqi edhe pse u inkuadrua vonë, mori një notë nga “Sofascore” prej 7.5, e cila ishte ndër më të lartat.  Ndërkohë, Muriqi do të luajë edhe në vikend me Fenerbahcen para se të udhëtojë për në Kosovë për dy ndeshjet e muajit nëntor, ndaj Izraelit dhe Irlandës.