Fitorja e Listës Studentore në zgjedhjet parlamentare në Serbi ka hapur një kapitull të ri politik, me përgatitjet për form...
KOSOVA
Vrasja e Arlinda Zekajt trondit Kosovën, Kuvendi miraton rezolutën me 67 vota dhe ngre komision hetimor
PiranjatPërditësimi i fundit 26 Tetor 2026, 22:54
Pas krimit në Vitomiricë të Pejës, Kuvendi i Kosovës ka miratuar një rezolutë për parandalimin e dhunës ndaj grave dhe fëmijëve. Kryeparlamentarja Albulena Haxhiu kritikoi deputetët që nuk qëndruan në sallë për votim. Kuvendi i Kosovës ka miratuar me 67 vota pro një rezolutë kundër dhunës ndaj grave dhe fëmijëve, pas vrasjes së Arlinda Zekajt në Vitomiricë të Pejës.
Në seancën e jashtëzakonshme, deputetët vendosën edhe ngritjen e një Komisioni Parlamentar që do të hetojë rrethanat e vrasjes së Zekajt. Themelimi i këtij komisioni ishte pika e parë e rezolutës.
Dokumenti kërkon forcimin e përgjegjësisë institucionale për parandalimin e dhunës në familje, trajtimin serioz të denoncimeve dhe përmirësimin e bashkëpunimit mes institucioneve për mbrojtjen e grave dhe fëmijëve. Rezoluta parashikon gjithashtu krijimin e një linje këshillimi falas për çiftet dhe familjet që përballen me vështirësi, ofrimin e shërbimeve të specializuara për parandalimin e sjelljeve të dhunshme dhe përsëritjes së tyre, si dhe këshillim psikologjik e edukim për parandalimin e dhunës që në adoleshencën e hershme.
Megjithatë, jo të gjithë deputetët morën pjesë në votim. Mungesat shkaktuan reagimin e kryetares së Kuvendit, Albulena Haxhiu, e cila kritikoi ata që, sipas saj, ngritën akuza gjatë debatit, por nuk qëndruan për të votuar rezolutën.
“Të vijnë këtu e të hedhin akuza e mos me qëndru në sallë për të votuar, kjo për mua nuk ka asnjë kuptim. Gjithsesi secili deputet le ta ketë përgjegjësinë e vetë”, deklaroi Haxhiu.
Miratimi i rezolutës vjen në një kohë kur vrasjet e grave dhe dhuna në familje vijojnë të ngrenë shqetësime serioze për sigurinë e viktimave dhe efektivitetin e institucioneve përgjegjëse për mbrojtjen e tyre.
