Moti i keq në Vlorë, pezullohet lundrimi për mjetet e vogla dhe anijet e peshkimit

Kushtet e përkeqësuara atmosferike në detin e Vlorës kanë detyruar autoritetet të marrin masa për kufizimin e lundrimit të mjeteve të vogla lundruese dhe anijeve të peshkimit.

Ndalimi do të hyjë në fuqi sot, më 11 nëntor, në orën 16:00 dhe do të qëndrojë në fuqi deri më 14 nëntor, në orën 06:00.

Masa parashikon pezullimin e lundrimit në det të hapur, jashtë Gjirit të Vlorës, për mjetet e vogla dhe anijet e peshkimit, për shkak të erërave të forta dhe dallgëzimit të lartë.

Sipas parashikimeve meteorologjike, gjatë kësaj periudhe era pritet të arrijë forcën 7-8 ballë, me shpejtësi nga 20 deri në 35 metra në sekondë. Ndërkohë, lartësia e dallgëve parashikohet të jetë nga 2 deri në 4.5 metra.

Pavarësisht kufizimeve, anijet që kryejnë transport ndërkombëtar do të vijojnë aktivitetin normalisht, duke respektuar itineraret dhe destinacionet e përcaktuara.

Masat synojnë garantimin e sigurisë në det dhe shmangien e incidenteve të mundshme gjatë ditëve me kushte të pafavorshme atmosferike.