Në arrest shtëpie, 39-vjeçari shqiptar shpërndante drogë dhe mbante arsenal armësh

Ishte në arrest shtëpie, por sipas denoncimeve vazhdonte të shpërndante drogë. Një 39-vjeçar shqiptar është arrestuar nga Seksioni i Operacioneve Speciale të Policisë së Brescias, pas një kontrolli në banesën e tij në Ospitaletto, ku efektivët sekuestruan mbi 250 gramë kokainë, më shumë se një kilogram lëndë për përzierjen e drogës dhe materiale për paketimin e saj.

Hetimi nisi nga denoncimet në aplikacionin YouPol

Operacioni u ndërmor pas disa denoncimeve të mbërritura përmes aplikacionit YouPol, ku raportohej se 39-vjeçari, i cili ndodhej në arrest shtëpie, dyshohej se vazhdonte aktivitetin e shpërndarjes së drogës.

Hetuesit, në bashkëpunim me Policinë Bashkiake të Ospitalettos, organizuan një shërbim vëzhgimi dhe kontrolli për të verifikuar informacionet.

Kokainë dhe armë imituese në banesë

Gjatë ndërhyrjes, 39-vjeçari tentoi të hiqte qafe dy paketime që përmbanin lëndë për përzierjen e drogës dhe bëri rezistencë të dhunshme, duke plagosur një efektiv policie, i cili mori ndihmë mjekësore në urgjencë.

Kontrolli i mëvonshëm në banesë çoi në sekuestrimin e:

254 gramë kokainë;
1.169 gramë lëndë për përzierjen e drogës;
peshoreve elektronike të precizionit dhe materialeve për paketimin e lëndëve narkotike;
11 imitimeve të armëve të zjarrit, pa tapën e kuqe identifikuese.
Arrestimi dhe nisja e procedurave për dëbim

39-vjeçari u arrestua me akuzat për mbajtje të lëndëve narkotike me qëllim shpërndarjen, kundërshtim të punonjësit të policisë dhe plagosje të një zyrtari publik. Më pas, ai u transferua në burgun e Brescias.

Gjithashtu, prefekti i policisë ka urdhëruar revokimin e lejes së qëndrimit, duke nisur procedurat që mund të çojnë në dëbimin e tij nga Italia, pasi të përfundojë procesi gjyqësor. /PiranjatNews/