Kryeministrja italiane Giorgia Meloni ka rikonfirmuar qëndrimin e saj ndaj presidentit amerikan Donald Trump, duke deklaruar hapur se nuk ka asnjë ars...
Presidenti amerikan Donald Trump ka ashpërsuar qëndrimin ndaj zgjedhjeve presidenciale në Brazil, duke i cilësuar ato si “një tur...
BOTA
Nënë e bijë u zhytën drejt vdekjes në det, realizohet amaneti i tyre i fundit
PiranjatPërditësimi i fundit 29 October 2026, 21:48
Monica Montefalcone dhe vajza e saj, Giorgia Sommacal, të cilat humbën jetën tragjikisht në majin e këtij viti gjatë një zhytjeje në shpellat e atollit Vaavu, në Maldive, do të prehen përgjithmonë në det.
Dëshira e tyre ishte që hiri i tyre të shpërndahej në ujërat e Capo Mannu, në Sardenjë, një parajsë detare që e donin shumë. Kështu u bë edhe realiteti mëngjesin e 28 tetorit, kur hiri i Monicës, biologe detare dhe pedagoge universitare, dhe i vajzës së saj, Giorgia, u shpërnda në det gjatë një ceremonie prekëse dhe plot emocione.
Lamtumira e fundit
Monica Montefalcone ishte një eksperte e zhytjes dhe drejtuese e disa prej projekteve më të rëndësishme për mbrojtjen e mjediseve detare. Ajo kishte një lidhje të veçantë me detin e zonës së mbrojtur detare të Sinisit, në provincën e Oristanos, ku kalonte pushimet që në fëmijëri.
Mes notit dhe shëtitjeve buzë detit, ajo kishte shprehur dëshirën që, pas kremimit, të prehej përgjithmonë në ato ujëra.
Bashkëshorti i saj, Carlo Sommacal, e bëri të ditur dëshirën e Monicës menjëherë pas humbjes tragjike të saj dhe vendosi ta respektonte atë.
“Kanë qenë momente shumë të forta emocionalisht. Tani deti që ato aq shumë e donin do t’i përkundë dhe do t’i ruajë përgjithmonë”, u shpreh ai me vështirësi pas lamtumirës së fundit me bashkëshorten dhe vajzën.
Ceremonia mortore e nënë e bijë u zhvillua më 30 maj në Xhenova, ku banonte familja. Megjithatë, për shpërndarjen e hirit në det u desh të pritej përfundimi i afatit të përcaktuar nga legjislacioni rajonal.
Një lamtumirë e dhimbshme, por edhe përmbushja e dëshirës së tyre të fundit: të prehen përgjithmonë në detin që aq shumë e deshën.
Tragjedia
Dy zhytëset humbën jetën më 14 maj, së bashku me tre kolegë të tjerë të zhytjes. Trupat e tyre u gjetën brenda një shpelle, në një thellësi prej rreth 60 metrash, në një mjedis veçanërisht të vështirë për shkak të kalimeve të ngushta dhe dhomave nëntokësore.
Alarmi u dha pasi pesë zhytësit nuk dolën në sipërfaqe brenda afatit të parashikuar. Operacionet e para të kërkimit u vështirësuan edhe më shumë nga moti i keq dhe kushtet e zonës.
Sipas rezultateve të autopsisë, të pesë zhytësit humbën jetën nga anoksia, pra mungesa e oksigjenit.
Kujtimi
Siç raporton gazeta L’Unione Sarda, miqtë e Monica Montefalcone dëshirojnë ta përkujtojnë atë me një dedikim të veçantë, të cilin do ta gdhendin në një gur ranor pikërisht në Capo Mannu, vendin ku ajo e donte aq shumë natyrën dhe ku, gjatë pushimeve, dilte për të vrapuar herët në mëngjes. Një gjest simbolik për të ruajtur kujtimin e një gruaje që ia kushtoi jetën detit dhe mbrojtjes së tij. /PiranjatNews/
