Pallati i shkatërruar nga shpërthimi në Elbasan do të shembet, banorët mbeten pa shtëpi

Godina pesëkatëshe në Unazën Jugore është shpallur e pabanueshme pas shpërthimit që shkaktoi dy viktima dhe disa të plagosur. Familjet nuk mund të rikthehen në apartamente, ndërsa pritet ndërhyrja e Bashkisë së Elbasanit për strehimin e tyre të përkohshëm. Bonusi i qirasë është një nga zgjidhjet e mundshme, por mbetet për t'u sqaruar kur dhe si do të sigurohen banesat e reja.

Banorët e pallatit pesëkatësh në Unazën Jugore të Elbasanit, ku një shpërthim i fuqishëm, i dyshuar si pasojë e një bombole gazi, shkaktoi dy viktima dhe disa të plagosur, nuk do të mund të kthehen më në apartamentet e tyre. Godina është shpallur e pabanueshme pas konstatimit të dëmtimeve të rënda strukturore dhe, sipas informacionit të raportuar, do të shembet. Vendimi prek edhe familjet që jetonin në pjesën e pallatit e cila nuk u shkatërrua drejtpërdrejt nga shpërthimi. Verifikimet në terren kanë konstatuar se dëmtimet janë shtrirë edhe në pjesën tjetër të ndërtesës, duke e bërë të pasigurt qëndrimin në të.

Banorët nuk do të lejohen të hyjnë lirisht në apartamente për të marrë mobiliet apo sendet personale. Marrja e dokumenteve, sendeve me vlerë dhe objekteve të tjera të domosdoshme do të bëhet vetëm me ndihmën dhe mbikëqyrjen e ekipeve të specializuara, përfshirë shërbimin zjarrfikës. Shqetësimi më i madh tashmë është strehimi i familjeve që kanë humbur banesat. Bashkia e Elbasanit pritet të ndërhyjë për sistemimin e tyre, ndërsa një nga mundësitë e përmendura është mbështetja përmes bonusit të qirasë, me vendimmarrje të Këshillit Bashkiak.

Kryebashkiaku Gledian Llatja ka konfirmuar se një pjesë e banorëve janë sistemuar tashmë në konviktin e qytetit, ku u janë siguruar edhe ushqimet, ndërsa të tjerë po qëndrojnë te të afërmit. Ai deklaroi se Bashkia do të vazhdojë t'u sigurojë strehim familjeve në nevojë deri në përfundimin e procedurave ligjore dhe përcaktimin e masave sipas legjislacionit për emergjencat civile.

Drejtoresha e Institutit të Ndërtimit, Persida Shkrepa, konfirmoi se pallati, i ndërtuar në vitet ’70, ka pësuar dëmtime të rënda nga shpërthimi dhe zjarri që pasoi. Ajo kërkoi marrjen e masave sa më të shpejta për shembjen e objektit, si dhe sigurimin e ndërtesave përreth në një rreze prej 30 metrash.

 Tragjedia ndodhi dje në lagjen “Qemal Stafa”. Sipas Policisë së Elbasanit, humbën jetën një 69-vjeçar dhe një 82-vjeçare, ndërsa 10 banorë të tjerë morën ndihmë mjekësore. Hetimet paraprake tregojnë se shpërthimi mund të jetë shkaktuar nga grumbullimi i gazit në banesën e 69-vjeçarit, por hetimet për zbardhjen e plotë të rrethanave vijojnë.