Situata përpara Ministrisë së Arsimit ka përshkallëzuar sërish në përplasje të dhunshme fizike mes efektivëv...
POLITIKE
Policia dhunoi barbarisht studentët/ Ervin Demo ndryshon qëndrim, kërkon ligjshmëri dhe hetim për dhunën!
PiranjatPërditësimi i fundit 13 Tetor 2026, 21:14
Ministri i Brendshëm, Ervin Demo, ka reaguar për herë të dytë pas protestës së zhvilluar në Tiranë, duke dënuar dhunën dhe duke theksuar se çdo veprim i punonjësve të Policisë do të analizohet.
Në reagimin e tij, aii shpreh shqetësimin për personat e lënduar gjatë përplasjeve, përfshirë studentët, qytetarët, gazetarët dhe efektivët e Policisë, ndërsa në reagimin e parë përmendi vetëm policët.
Demo nënvizon se e drejta për të protestuar është e garantuar, por nuk mund të përdoret si justifikim për dhunën apo dëmtimin e pronës.
Ministri thekson se policia ka detyrimin të garantojë rendin dhe sigurinë publike, por njëkohësisht çdo ndërhyrje e saj duhet të jetë në përputhje me ligjin.
Për këtë arsye, sipas tij, pretendimet për përdorim të paligjshëm ose joproporcional të forcës duhet të shqyrtohen në mënyrë të paanshme.
Demo kërkon që pamjet filmike dhe dëshmitë nga protesta të verifikohen, në mënyrë që përgjegjësitë të përcaktohen mbi bazën e provave dhe jo të hamendësimeve.
“Të dashur qytetarë,
Sot, në Luksemburg, Shqipëria mori një tjetër vlerësim për përparimin e saj drejt Bashkimit Europian, duke mbyllur përkohësisht një tjetër kapitull të negociatave. Ky përparim na ngarkon me përgjegjësi për të zbatuar standardet europiane edhe në mënyrën se si institucionet tona përballojnë kundërshtitë e cilitdo dhe mbrojnë të drejtat e qytetarëve.
Ngjarjet e sotme përpara Ministrisë së Arsimit janë shqetësuese. Shpreh shqetësimin tim për çdo person të lënduar, qoftë student, qytetar, gazetar apo punonjës policie, dhe u uroj të gjithëve shërim të shpejtë. Institucionet përgjegjëse do të publikojnë një bilanc të plotë e të verifikuar të të lënduarve.
Dënoj pa asnjë rezervë sulmet ndaj punonjësve të Policisë, dëmtimin e pronës publike dhe private. Protesta paqësore është një e drejtë demokratike që shteti ynë e garanton plotësisht. Dhuna ndaj njerëzve dhe institucioneve nuk mund të justifikohet në emër të kësaj të drejte themelore.
Policia e Shtetit ka detyrimin të mbrojë qytetarët, institucionet dhe sigurinë publike. Efektivët meritojnë mbështetje për ushtrimin e detyrës brenda ligjit dhe e kanë detyrë të mbrohen nga çdo sulm ndaj tyre.
Njëkohësisht, çdo veprim i Policisë duhet të jetë i ligjshëm, i nevojshëm dhe proporcional. Organet kompetente do të shqyrtojnë paanshmërisht çdo pretendim për përdorim të paligjshëm apo joproporcional të forcës, pa i paraprirë asnjë përfundimi hetimor. Çdo pamje dhe dëshmi që ndihmon në zbardhjen e çdo detaji të mundshëm duhet të ruhet dhe të verifikohet.
Ligji duhet të zbatohet njësoj për këdo.
Përgjegjësitë duhet të përcaktohen individualisht, mbi bazën e provave. Pjesëmarrja në të njëjtën protestë nuk e bën askënd përgjegjës për veprimet e një personi tjetër krah tij.
U kam kërkuar strukturave përgjegjëse të marrin masat për uljen e tensioneve dhe parandalimin e përplasjeve të tjera, duke garantuar sigurinë publike dhe të drejtën për protestë paqësore. Gazetarët duhet të mund ta kryejnë punën e tyre në siguri.
Standardi europian kërkon një shtet që garanton rendin, respekton liritë dhe jep llogari për veprimet e veta. Kjo është përgjegjësia që duhet të përmbushim edhe pas ngjarjeve të sotme.
