Nga Florjan Binaj
Ky vit do të mbahet mend si viti i rënies së autokracive të Europës Lindore e Juglindore. Fillimisht Orbani, nje...
POLITIKE
Sali Berisha sqaron qasjen e PD: Nuk jemi organizatorët e protestës, por e mbështesim atë
PiranjatPërditësimi i fundit 30 October 2026, 20:51
Kryetari i Partisë Demokratike, Sali Berisha, ka deklaruar se PD mbështet plotësisht protestat studentore dhe ka qenë e pranishme në to që nga dita e parë, por nuk pretendon autorësinë e organizimit të tyre.
I ftuar në emisionin “ÇdoKënd” të gazetares Merita Haklaj në A2 CNN, Berisha tha se Partia Demokratike është pjesë e protestave që prej 1 qershorit, duke theksuar se gjatë muajve të verës anëtarët e saj morën pjesë në tubime pa përdorur simbolet politike, për të respektuar karakterin qytetar të lëvizjes.
“Partia Demokratike është në protestë që në datën 1 qershor, por dua të sqaroj një gjë. Vera që kaloi u karakterizua nga protesta më e madhe qytetare në historinë e vendit. Në këto rrethana, partia e protestës, nëna e protestës në Shqipëri, u përshtat dhe respektoi karakterin qytetar. Morën pjesë me qindra mijëra anëtarë të PD-së çdo natë, pa simbolet e saj. Vendosi të respektonte frymën dhe karakterin qytetar”, deklaroi Berisha.
Duke u ndalur te protesta e studentëve, kreu demokrat tha se thirrja fillestare erdhi nga Sindikata e Universiteteve, e cila organizoi tubimin e 13 tetorit përpara Ministrisë së Arsimit.
Ai theksoi se strukturat rinore të PD-së iu përgjigjën kësaj thirrjeje, ndërsa kundërshtoi përpjekjet për t'ia atribuuar organizimin e protestës një force të caktuar politike.
“Sa i përket protestës së studentëve, po përpiqen shumë për autorësi, por e vërteta është se protesta u thirr nga Sindikata e Universiteteve, më 13 tetor, te Ministria e Arsimit. Analizat e rreme janë të neveritshme. Thirrjes për protestë iu përgjigj Forumi Rinor i Partisë Demokratike, dega e universiteteve. Kështu që, në datën 13 në protestë ishin me qindra anëtarë të strukturave të PD-së, por edhe grupe pa lidhje me Forumin”, u shpreh ai.
Berisha akuzoi kryeministrin Edi Rama për mënyrën se si autoritetet reaguan ndaj protestuesve në ditën e parë të mobilizimit studentor.
“Edi Rama u hodh kafshërisht mbi ta dhe mendoi se duke i shtypur egërsisht ditën e parë, do të shuhej zëri i tyre. Përkundrazi, ata thirrën sërish protestë. Ne jemi në mbështetje të revoltës studentore dhe në mbrojtje të tyre”, deklaroi kryetari i PD-së.
Në vijim, Berisha ritheksoi se pjesëmarrja e strukturave demokrate në tubime nuk nënkupton se Partia Demokratike qëndron pas organizimit të tyre.
“Partia Demokratike nuk pretendon të jetë organizatore e protestës, por kemi marrë pjesë që në minutën e parë. Strukturat tona në universitete dhe gjimnaze iu përgjigjën thirrjes për protestë, por nuk jemi organizatorë”, theksoi ai.
Kreu i opozitës shtoi gjithashtu se mbështetja për protestat studentore nuk kufizohet vetëm te Partia Demokratike.
“Janë të gjitha partitë aleate në mbështetje të protestës”, përfundoi Berisha.
