Gersi bën historinë, studenti i parë me sindromën Down në vend

Gersi Troka po shkruan historinë në Shqipëri, duke u bërë studenti i parë me sindromën Down që ndjek studimet universitare.

23-vjeçari, i njohur edhe si kampion në not në Lojërat Olimpike Speciale në Berlin 2023, ka nisur studimet në Universitetin e Sporteve, duke realizuar një tjetër ëndërr të madhe në jetën e tij.

I vlerësuar me “Çmimin e Kurajos” nga ambasada amerikane për arritjet në sport, Gersi shprehet i lumtur dhe krenar për këtë hap të rëndësishëm. Ai tregon se zgjedhja për të studiuar sportet lidhet drejtpërdrejt me pasionin e tij për notin dhe dëshirën për të qenë sa më aktiv.

Përveç suksesit në studime, ai vazhdon të përfaqësojë Shqipërinë në gara ndërkombëtare, duke synuar rezultate të reja dhe duke dëshmuar se kufijtë ekzistojnë vetëm për t’u thyer.

Megjithatë, Gersi nuk heziton të ngrejë zërin për mungesën e mbështetjes ndaj personave me aftësi të kufizuara, duke kërkuar më shumë angazhim nga institucionet dhe shoqëria për të krijuar mundësi të barabarta.

Nga ana tjetër, Universiteti i Sporteve ka bërë të ditur se do të ofrojë një program të posaçëm për të, duke i mundësuar të balancojë studimet me stërvitjen dhe garat.
Historia e Gersit është një shembull frymëzimi dhe force, që tregon se me vullnet dhe përkushtim, çdo ëndërr mund të bëhet realitet.