Tensione të reja në Ngushticën e Hormuzit, Irani pretendon se katër cisterna nafte janë goditur nga mina detare

Katër cisterna nafte janë shkatërruar pasi dyshohet se kanë goditur mina detare në Ngushticën e Hormuzit. Lajmi është bërë i ditur të mërkurën nga Garda Revolucionare e Iranit (IRGC), në një kohë kur përplasjet mes Teheranit dhe Uashingtonit vijojnë të përshkallëzohen.

Sipas agjencisë gjysmëzyrtare iraniane Tasnim, dy prej cisternave vazhdonin të digjeshin, ndërsa dy të tjerat ishin sekuestruar nga autoritetet iraniane. IRGC pretendon se anijet po tentonin të kalonin përmes një korridori jugor të ndaluar në ngushticë.

Megjithatë, BBC ka bërë të ditur se nuk ka mundur t’i verifikojë në mënyrë të pavarur këto pretendime.

Një ditë më parë, Garda Revolucionare raportoi gjithashtu shkatërrimin e tri cisternave të tjera pas goditjes nga mina detare, si dhe rrëzimin e një droni amerikan MQ-9 mbi Ngushticën e Hormuzit.

Zhvillimet vijnë pas sulmeve amerikane ndaj objektivave në Iran dhe në një kohë kur negociatat për përfundimin e konfliktit kanë ngecur prej muajsh.