Tjetërsimi i 44 mijë m² tokë në Povelçë/ Drejtori i Spitalit të Fierit dërgohet në paraburgim pas katër orësh marrje në pyetje

Drejtori i Spitalit Rajonal të Fierit, Arben Voja, është dërguar në dhomat e paraburgimit në Drejtorinë e Policisë së Fierit, pas më shumë se katër orësh marrje në pyetje nga prokurorët.

Voja u arrestua me urdhër të Prokurorisë së Posaçme, në kuadër të hetimeve për shpërdorim detyre dhe falsifikim dokumentesh, lidhur me tjetërsimin e rreth 44 mijë metrave katrorë tokë shtetërore në zonën e Povelçës. Sipas hetimeve, prona dyshohet se i është kaluar një biznesmeni për ndërtimin e një impianti fotovoltaik, duke përdorur dokumente të falsifikuara.

Veprimet e dyshuara lidhen me periudhën kur Voja ishte në krye të Kadastrës së Fierit, ndërsa për këtë çështje janë caktuar katër masa sigurie 'arrest në burg'. Mes personave nën hetim janë edhe një ish-jurist i Kadastrës, një hartografe dhe një notere, si dhe punonjës të tjerë të institucionit. Voja është ndaluar nga autoritetet dhe është marrë në pyetje nga dy prokurorë. Emri i tij është përfshirë edhe në një kallëzim të Agjencisë Shtetërore të Kadastrës në SPAK, në maj të vitit 2023, për dyshime mbi shpërdorim detyre dhe falsifikim dokumentesh.

Në atë rast, dëmi i pretenduar ndaj shtetit vlerësohej në 9.5 milionë lekë. Gjithashtu, në dhjetor të vitit 2025, Prokuroria e Fierit e dërgoi Vojën dhe gjashtë ish-punonjës të Agjencisë Rajonale të Mjedisit Fier-Vlorë-Gjirokastër për gjykim, nën dyshimet për shpërdorim detyre lidhur me dhënien e lejeve mjedisore dhe mosarkëtimin e tarifave përkatëse.