VIDEO/ Turistët shkatërrojnë statujën e Jezu Krishtit në Lituani, e shkëputin nga kryqi dhe largohen duke qeshur

LITUANI- Dy turistë kanë shkaktuar dëme në një kishë në kryeqytetin e Lituanisë, Vilnius, pasi kanë hequr një statujë të artë të Jezu Krishtit nga kryqi prej druri dhe e kanë thyer në tokë, ndërsa qeshnin me veprimin e tyre. Ngjarja është regjistruar nga kamerat e sigurisë gjatë natës së 11-12 nëntorit, jashtë Shenjtërores së Mëshirës Hyjnore, në qendrën historike të qytetit. Sipas mediave, dy personat dyshohet se janë turistë britanikë, por identiteti dhe kombësia e tyre nuk janë konfirmuar zyrtarisht.

Pamjet tregojnë njërin prej burrave teksa shkëput statujën nga kryqi dhe përpiqet të fotografohet me të, ndërsa shoku i tij regjistron gjithçka me telefon. Gjatë lëvizjeve, pjesët e statujës shkëputen dhe ajo përfundon e copëtuar në asfalt. Në vend që të ndihmojë për riparimin e dëmit, burri largohet duke qeshur, ndërsa pak çaste më vonë një automjet kalon mbi fragmentet e statujës, duke i dëmtuar edhe më tej. Sipas informacioneve paraprake, njëri prej tyre dyshohet se ishte nën ndikimin e 

Pas publikimit të pamjeve, prifti i famullisë, Elijah Anatoligius Markauskas, iu drejtua qytetarëve përmes rrjeteve sociale, duke kërkuar ndihmë për identifikimin e personave përgjegjës. Ai shprehu keqardhjen për shkatërrimin e statujës, duke theksuar rëndësinë e saj për komunitetin e besimtarëve. Ndërkohë, banorët dhe besimtarët janë mbledhur pranë kryqit, ku kanë vendosur lule dhe kanë mbledhur pjesët e thyera të figurës fetare. Policia e Vilniusit ka nisur një hetim penal për ngjarjen, e cila po shqyrtohet në bazë të Nenit 284 të Kodit Penal të Lituanisë. Autoritetet ende nuk kanë përcaktuar vlerën e dëmit material.