“Zhurma deri në orët e vona dhe gjeste kërcënuese ndaj banorëve”/ Banorët në Durrës: Ndërtimi i pallatit vijon punimet edhe pas orës 22:00

Banorët e një pallati në rrugën e Portit, në Durrës, kanë denoncuar në redaksinë e Piranjave vijimin e punimeve të ndërtimit deri në orët e vona të mbrëmjes, duke shkaktuar shqetësim për shkak të zhurmës së makinerive të rënda.

Sipas denoncuesit, punimet kanë vijuar deri rreth orës 22:30, ndërsa ndërhyrja e Policisë ka bërë të mundur ndërprerjen e tyre. Ai pretendon se, pavarësisht shqetësimit të banorëve, punëtorët nuk kishin ndërmend të ndalonin aktivitetin.

Denoncuesi ngre shqetësime edhe për sjelljen e punëtorëve, të cilët, sipas tij, kanë reaguar në mënyrë arrogante ndaj banorëve, duke bërë gjeste me duar dhe këmbë. 

Banorët kërkojnë respektimin e orareve të punimeve dhe marrjen e masave për të shmangur shqetësimin e tyre nga zhurmat, si dhe për të garantuar komunikim korrekt me punonjësit e kantierit./ Piranjat