Nuk u kthye në shtëpi, punëtori shqiptar gjendet i vdekur në vendin e punës

Kur familjarët panë se ai nuk po kthehej, njoftuan policinë. Dhe pikërisht në kantierin ku ai punonte, në rrugën Goito, në Padova, efektivët e patrullave gjetën trupin e tij gjatë natës mes 23 dhe 24 shtatorit.

51-vjeçari shqiptar, i cili prej orësh nuk kishte mundur të kontaktohej nga familjarët, u gjet brenda pusit të ashensorit të një ndërtese që ishte në rikonstruksion. Dyshohet se bëhet fjalë për një aksident në punë: burri mendohet se ka rënë brenda pusit të ashensorit ndërsa ishte duke punuar.

Policia lokalizoi telefonin e tij celular, gjeti furgonin e tij me kasën e ngarkimit të hapur dhe i telefonoi në celular, duke arritur kështu të përcaktonte vendndodhjen e tij.

51-vjeçari ishte pronar i një kompanie të specializuar në punime armaturash dhe banonte në zonën e Vicenzës. Në vendngjarje mbërritën ekipet e 118-ës, zjarrfikësit, efektivët e skuadrës së lëvizshme të Drejtorisë së Policisë dhe policia shkencore. Hetimet vijojnë për të përcaktuar shkaqet dhe dinamikën e saktë të aksidentit. /PiranjatNews/