Ra në kontakt me energjinë elektrike, humb jetën 28-vjeçari filipinas në Durrës

Një ngjarje e rëndë ka ndodhur mesditën e sotme në Durrës, ku një 28-vjeçar me origjinë nga Filipinet ka humbur jetën gjatë punës.

Sipas njoftimit të policisë, bëhet me dije se ngjarja ka ndodhur rreth orës 12:20, në lagjen nr. 1 të qytetit. I riu, i identifikuar me inicialet A. R., 28 vjeç, ishte punonjës i një firme private dhe në momentin e ngjarjes po punonte në një varkë.

Nga të dhënat paraprake rezulton se 28-vjeçari po përdorte një pompë për të hequr ujin nga varka, kur ka rënë në kontakt me energjinë elektrike. Kontakti me rrymën ka rezultuar fatal dhe i riu ka humbur jetën.

Në vendngjarje ka mbërritur grupi hetimor, i cili po vijon veprimet për të përcaktuar shkaqet dhe rrethanat e plota të ngjarjes.