Arrestohet ushtari amerikan në Britani, dyshohet se spiunonte për Rusinë! FBI: Çështje me shqetësim maksimal për SHBA-në dhe aleatët

Një ushtar amerikan 41-vjeçar është arrestuar pranë qytetit Gloucester në Britaninë e Madhe, nën dyshimin për spiunazh në favor të Rusisë. Operacioni u zhvillua nga policia britanike kundër terrorizmit, në bashkëpunim me ushtrinë amerikane dhe agjencitë ligjzbatuese të SHBA-së. Çështja ka tërhequr vëmendjen e autoriteteve në të dyja vendet, ndërsa FBI e ka cilësuar atë si një rast me shqetësim maksimal për Uashingtonin dhe aleatët e tij.

Sipas policisë së Londrës, 41-vjeçari u arrestua të martën në bazë të legjislacionit për sigurinë kombëtare dhe u dërgua në një komisariat në kryeqytetin britanik, ku vijon të mbahet në paraburgim.

“Ky arrestim i rëndësishëm dhe hetimi janë rezultat i bashkëpunimit të ngushtë mes autoriteteve britanike dhe amerikane”, deklaroi Vicki Evans, koordinatore e lartë kombëtare për luftën kundër terrorizmit në Britani.

Ajo theksoi se akuzat janë serioze dhe se hetimet vijojnë, ndërsa sqaroi se rasti nuk lidhet me asnjë prej hetimeve të tjera që po zhvillohen aktualisht nga policia britanike kundër terrorizmit.

Drejtori i FBI-së, Kash Patel, falënderoi policinë dhe shërbimet e inteligjencës britanike për bashkëpunimin në këtë operacion.

“Ky arrestim i rëndësishëm lidhet me akuza për spiunazh, të cilat përbëjnë një çështje me shqetësim maksimal për Shtetet e Bashkuara dhe aleatët tanë”, u shpreh Patel.

Edhe drejtuesi i Komandës së Kundërzbulimit të Ushtrisë Amerikane, Sean Stinchon, reagoi për rastin, duke paralajmëruar për rrezikun që paraqesin kërcënimet e brendshme në strukturat ushtarake.

“Sjellja e dyshuar e një ushtari të lartë, të cilit i janë besuar informacione sensitive, është një kujtesë tronditëse se kërcënimet e brendshme janë reale dhe të vazhdueshme”, deklaroi ai.

Ndërkohë, Pentagoni i ka referuar pyetjet për këtë çështje te Ushtria Amerikane, e cila nuk ka dhënë ende detaje të mëtejshme mbi identitetin e ushtarit apo informacionet që dyshohet se mund të ketë përcjellë.