56-vjeçari kapet me 14 mijë paund drogë në makinë, ndërsa një qengj hante patate të skuqura

Një burrë, i cili u kap në një makinë me drogë me vlerë 14 mijë paund, ndërsa në sediljen e pasme një qengj po hante patatina nga një qese, ka arritur t’i shpëtojë burgut. John McNeil, 56 vjeç, ishte pasagjer në automjetin e Lindsey Sangster, i cili u ndalua nga policia në autostradën M74, në Glasgow, më 22 prill 2023. 

Gjatë kontrollit, një qen i policisë zbuloi më vonë disa qese me heroinë dhe kokainë, të fshehura poshtë sediljes së pasagjerit përpara, në një automjet Volkswagen Golf. Kur u pyet për kafshën, e quajtur Pablo, një rreshter policie pretendoi se partnerja e Sangster, McNeil, i kishte thënë se ishte një "bareshë në trajnim". Dy personat u shpallën fajtorë në shtator për posedim të kokainës dhe diamorfinës (heroinës), me qëllim shpërndarjen e tyre.

Çifti pretendoi se kishte tentuar të shpëtonte qengjin, të cilin e kishin quajtur Pablo, në nder të bosit kolumbian të drogës Pablo Escobar, pasi e kishin gjetur në një "pozicion të rrezikshëm", në mes të rrugës.

Sipas një deklarate të përbashkët të provave të pranuara nga palët, pronarja e kafshës nuk u kishte dhënë leje dy personave për ta marrë qengjin.

Rreshteri i policisë Nick Twigg, 42 vjeç, u tha anëtarëve të jurisë se kishte pasur arsye për të ndaluar makinën e Sangster në autostradë. Në automjet ndodheshin Sangster, McNeil dhe një tjetër burrë.

"Unë e pyeta Sangster se nga kishte ardhur qengji dhe McNeil më tha se ajo ishte një fermere në trajnim", deklaroi oficeri.

Prokurorja Julianna Keenan e pyeti nëse kishte ndonjë provë për këtë pretendim, ndërsa ai u përgjigj:

"Jo, në atë moment qengji po hante patatina nga një qese e lënë në sediljen e pasme. Nuk kishte asnjë shishe."

Më vonë, një qen policie izbuloi dy qese me drogë poshtë sediljes së përparme të pasagjerit. Në to u gjetën kokainë me vlerë 4,640 paund dhe heroinë me vlerë 10,050 paund.

Pastërtia e kokainës rezultoi të ishte të paktën 76%.

Në një deklaratë të përbashkët mbi provat, prokurorja Keenan tha se policia kishte arritur në përfundimin se rrethanat e çështjes tregonin për qëllim shpërndarjen e kokainës dhe heroinës, pasi sasia e sekuestruar ishte shumë e madhe për përdorim personal.

Pablo u dërgua në një fermë në Ayrshire, ku qëndroi për 48 deri në 72 orë, përpara se t'i kthehej pronares së tij, Mair.

Akuza për marrjen dhe mbajtjen e paligjshme të qengjit u tërhoq nga prokuroria në mes të gjyqit, pasi në atë kohë nuk ishte raportuar asnjë vjedhje.

Gjatë dëshmisë së tij në gjykatë, McNeil u tha anëtarëve të jurisë se kishte përvojë me kafshët, pasi në të kaluarën kishte punuar me të atin, i cili ishte një kontraktor bujqësor në pension.

Ai pretendoi se e kishin gjetur Pablon në mes të rrugës, teksa po ktheheshin për në shtëpinë e tyre në Ayrshire, pas një udhëtimi në Edinburg, ku personi tjetër kishte shkuar për të blerë një makinë.

Sipas McNeil, qengji ishte "i dehidratuar" dhe dukej se nuk ishte ushqyer prej disa orësh.

Ai deklaroi se plani i tyre ishte ta "kthenin te pronari", pasi Pablo kishte shenja identifikuese në veshë.

"Në kulmin e varësisë nga droga"

McNeil mohoi të kishte pasur dijeni për drogën në makinë, ashtu si edhe Sangster. Gjatë gjyqit u bë e ditur se Sangster ishte nën efektin e drogës në momentin kur drejtonte automjetin dhe se ajo e kishte pranuar fajësinë në një proces tjetër gjyqësor.

Ajo u dënua me 18 muaj heqje të së drejtës për të drejtuar automjetin dhe u urdhërua të kryente 100 orë punë në shërbim të komunitetit pa pagesë.

Avokatja mbrojtëse Bronwyn Moore, e cila përfaqësonte McNeil gjatë seancës së dënimit, deklaroi se klienti i saj tashmë punonte si drejtues ekipi në një kompani ndërtimi dhe se në momentin e arrestimit ndodhej "në kulmin e varësisë së tij".

McNeil, banues në Fairlie, North Ayrshire, u paraqit sërish në gjykatë për të marrë dënimin, ndërsa Sangster, nga Kilbirnie, nuk u paraqit. Për këtë arsye, gjykata lëshoi një urdhër arresti ndaj saj.

Sherifi Tony Kelly vendosi që McNeil të kryejë 300 orë punë të papaguar në shërbim të komunitetit dhe të mbajë një pajisje elektronike monitorimi për gjashtë muaj. Kjo do të thotë se ai duhet të qëndrojë në banesë nga ora 20:00 deri në 05:00.

Sherifi tha se ishte informuar se rreziku që McNeil të kryente sërish vepra penale ishte i ulët. Pasi qengji iu kthye pronares, Kirsty Mair deklaroi se ai ishte në gjendje shumë të mirë shëndetësore dhe i lumtur me "shokët e tij të rinj në fermë". /PiranjatNews/