Dhuna në protesta/ Demo del në mbrojtje të policisë, premton më shumë para për vitin 2027

Të rinj të plagosur, protestues që kanë humbur shikimin apo gjymtyrë, qytetarë të tërhequr zvarrë dhe denoncime për dhunë edhe ndaj personave të neutralizuar. Pamjet nga protestat e fundit në Tiranë kanë rikthyer në qendër të vëmendjes mënyrën se si Policia e Shtetit ka ushtruar forcën ndaj demonstruesve.

Pavarësisht denoncimeve të shumta dhe videove që po qarkullojnë në media e rrjetet sociale, ministri i Brendshëm, Ervin Demo, ka dalë në mbrojtje të veprimeve të policisë. Gjatë deklaratave të tij, ai u ndal te sjellja e protestuesve, duke e cilësuar dhunën e tyre si të tejskajshme.

Gjatë seancës dëgjimore të kësaj të mërkure në Komisionin për Çështjet e Brendshme dhe të Mbrojtjes, ku paraqiti projektbuxhetin e ministrisë për vitin 2027, Demo bëri të ditur se 9 punonjës policie janë pezulluar nga detyra dhe se 50 raste po shqyrtohen nga Agjencia e Mbikëqyrjes Policore. Ai shtoi se për rastet e referuara po bashkëpunohet edhe me Prokurorinë.

Megjithatë, shifrat e bëra publike nuk i japin ende përgjigje pyetjeve që kanë lindur pas ndërhyrjeve policore: Kush do të mbajë përgjegjësi për dëmtimet e protestuesve? A është respektuar parimi i proporcionalitetit gjatë përdorimit të forcës? Dhe cilat do të jenë pasojat për efektivët nëse hetimet vërtetojnë shkelje?

Pezullimi i 9 punonjësve dhe hetimi i 50 rasteve janë pjesë e procesit të verifikimit, por mbetet për t'u parë se çfarë do të nxjerrin hetimet dhe nëse do të ketë përgjegjësi konkrete. Qytetarët presin që institucionet të bëjnë transparencë jo vetëm për numrin e rasteve të regjistruara, por edhe për përfundimet e tyre.

Në fund të raportimit në Kuvend, ministri e zhvendosi fokusin te planet financiare për vitin e ardhshëm, duke theksuar se në buxhetin e vitit 2027 parashikohet mbështetje më e madhe për Policinë e Shtetit. Sipas tij, fondet shtesë do të shërbejnë për forcimin e kapaciteteve dhe rritjen e profesionalizmit të punonjësve të policisë.

Deklarata vjen në një moment kur pikërisht mënyra e ndërhyrjes së efektivëve, përdorimi i forcës dhe trajtimi i protestuesve janë bërë objekt debati publik, ndërsa përgjigjet për rastet e denoncuara priten ende nga institucionet përgjegjëse.