GTA 6 boshatis shkollat dhe shqetëson punëdhënësit në Britani, 35 mijë nxënës munguan në mësim

Lançimi i shumëpritur i videolojës GTA 6 duket se ka ndikuar edhe në frekuentimin e shkollave në Britani. Rreth 35 mijë nxënës të shkollave të mesme raportohet se kanë munguar në mësim të enjten, më 19 nëntor, në ditën e lançimit të lojës.
Sipas të dhënave të mbledhura nga 1,415 shkolla të mesme, që përfshijnë më shumë se 1.3 milionë nxënës, frekuentimi ra në 88.8%, nga mesatarja prej 91.3% e ditëve të mëparshme të javës.
Mungesat ishin veçanërisht të dukshme te djemtë e vitit të fundit të shkollës së mesme. Për këtë grup, norma e mungesave u rrit nga 8.9% në 13.8%.
Por duket se GTA 6 nuk ka joshur vetëm nxënësit. Edhe në vendet e punës është vënë re një ndryshim. Kompania britanike BrightHR, e cila ofron shërbime të menaxhimit të burimeve njerëzore, raportoi një rritje prej 56% të mungesave për arsye shëndetësore te punonjësit që monitoron, krahasuar me të enjten e javës paraardhëse.
Megjithatë, shifrat nuk provojnë se të gjithë këta persona kanë munguar për të luajtur GTA 6. Përkimi i datës së lançimit me rënien e frekuentimit ka nxitur gjithsesi reagime dhe humor në rrjetet sociale.
Pas 13 vitesh pritjeje, rikthimi i një prej videolojërave më të famshme në botë duket se ka shkaktuar një efekt që ka kaluar përtej ekranit.
Lexo edhe
BOTA
Trump i vendosur: Nuk do të lejoj që Irani të ketë armë bërthamore, pavarësisht kush i drejton SHBA-të

Wall Street Journal: Kim Jong Un po zgjeron kapacitetet bërthamore të Koresë së Veriut, çfarë zbuluan imazhet satelitore

Britanikët ndërrojnë mendje pas një dekade, sondazhi nxjerr rikthimin në BE në krye në 512 nga 632 zonat zgjedhore

Vuçiç tërhiqet nga zgjedhjet presidenciale? Paralajmëron bojkotin: Pjesëmarrja është e pakuptimtë

“Jam i bekuar gjenetikisht”, Trump bën deklaratën e pazakontë, kamerat filmojnë reagimin e Rubios dhe Vance




