Sa i kushton ekonomisë shqiptare një ditë grevë? Në Europë, humbjet arrijnë deri në 2.5 miliardë euro

Një ditë grevë e përgjithshme, në të cilën ndërpret punën 20% e fuqisë punëtore, mund t’i kushtojë ekonomisë shqiptare rreth 15 milionë euro, sipas një përllogaritjeje orientuese të bazuar në metodologjinë e përdorur nga Euronews për ekonomitë europiane. Ndërkohë, në Gjermani humbjet e mundshme arrijnë në 2.5 miliardë euro në ditë, ndërsa në Francë në 1.6 miliardë euro.

Nëse e njëjta metodologji do të zbatohej edhe për Shqipërinë, duke marrë si referencë një Prodhim të Brendshëm Bruto vjetor prej rreth 27 miliardë eurosh, rezulton se ekonomia shqiptare prodhon mesatarisht rreth 74 milionë euro në ditë. Në skenarin teorik ku 20% e aktivitetit ekonomik ditor ndërpritet për shkak të një greve, humbja e mundshme do të ishte rreth 15 milionë euro.

Kjo shifër nuk përfaqëson një humbje reale të regjistruar në Shqipëri, por një simulim ekonomik për të kuptuar ndikimin që mund të ketë një ndërprerje e gjerë e punës. Gjithashtu, vlera përfundimtare do të varej nga sektorët që përfshihen në grevë, kohëzgjatja dhe mundësia për të rikuperuar aktivitetin e ndërprerë.

Analiza e publikuar nga Euronews tregon se grevat e përgjithshme mund të shkaktojnë kosto të konsiderueshme për ekonomitë europiane, veçanërisht kur përfshijnë transportin, industrinë, shërbimet publike dhe sektorë të tjerë me rëndësi për aktivitetin ekonomik.

Gjermania humbet 2.5 miliardë euro në ditë, Franca 1.6 miliardë

Sipas përllogaritjeve të Euronews, të mbështetura në të dhënat e Eurostat për vitin 2025, Gjermania është vendi europian që do të përballonte humbjen më të madhe në vlerë absolute nga një ditë greve e përgjithshme.

Në skenarin e analizuar, ku një në pesë punonjës ndërpret punën dhe humbet rreth një e pesta e prodhimit ekonomik ditor, kostot e mundshme janë: Gjermania: 2.5 miliardë euro; Franca: 1.6 miliardë euro; Italia: 1.2 miliardë euro; Spanja: 930 milionë euro; Belgjika: 350 milionë euro; Portugalia: 170 milionë euro; Shqipëria: rreth 15 milionë euro, sipas përllogaritjes orientuese me të njëjtën metodologji.

Diferencat e mëdha ndërmjet vendeve lidhen kryesisht me madhësinë e ekonomive. Një ndërprerje e aktivitetit në Gjermani, ekonominë më të madhe të Europës, ka një ndikim shumë më të lartë në vlerë monetare sesa në ekonomitë e vogla.

Megjithatë, një humbje më e ulët në euro nuk nënkupton domosdoshmërisht një ndikim më të vogël ekonomik në raport me madhësinë e vendit.

Europa përballet me një valë grevash

Analiza publikohet në një periudhë kur disa vende europiane po përballen me protesta dhe greva për pagat, kostot e jetesës, strehimin dhe cilësinë e shërbimeve publike.

Në Spanjë, dy sindikatat më të mëdha, CCOO dhe UGT, kanë thirrur një grevë të përgjithshme 24-orëshe për 11 nëntorin, e para e organizuar bashkërisht prej tyre që nga viti 2012.

Franca zhvilloi një ditë kombëtare grevash dhe protestash më 5 nëntor, ndërsa në Itali sindikata CGIL ka paralajmëruar një grevë të përgjithshme për 20 nëntorin. Edhe në Belgjikë janë paralajmëruar ndërprerje të punës gjatë javës së 23 nëntorit.

Sipas të dhënave paraprake të Institutit Europian të Sindikatave (ETUI), viti 2025 mund të ketë qenë viti me aktivitetin më të lartë të grevave në Bashkimin Europian që prej vitit 1991. /Përshtati nga Euronews, ekofin.al