Shoferit iu hoqën akuzat për aksidentin tragjik, babai i 11-vjeçarit kërkon rishikim të ligjit: Ma ka lënë fëmijën me gj*k në mes të rrugës

I zhgënjyer nga heqja e dy prej akuzave që rëndonin mbi shoferin Nikollë Radaçi, i cili më 3 maj të 2026 i përplasi djalin e tij 11 vjeç, babai i të miturit, pas mbylljes së seancës së sotme gjyqësore ka folur për mediat duke bërë thirrje për rishikim të ligjit, ndërsa kërkon drejtësi për plagosjen e të birit.

“Ne nga shteti kërkojmë vetëm drejtësi dhe të shikohet ligji siç është për t’u parë. Nuk u njohëm fare me akuzën sepse ai kishte përfituar nga amnistia. Ne kërkojmë që të rishikohet ligji, amnistia që ka falur largimin nga vendngjarja të autorit, se ai djalin tim pas aksidentit e ka lënë në mes të rrugës dhe ka ikur.”, thotë babai i të miturit.

Ndonëse Radaçi përfitoi nga ligji i miratuar në qershorin të këtij viti, qytetari në fjalë shprehet me bindje të plotë se do ta çojë këtë çështje derisa drejtësia të vendoset në vend, ndërsa thotë se nuk do e falë gjakun e fëmijës së tij.

“Unë do e vazhdoj betejën në gjyqe deri në fund sa të kem mundësi, sepse është gjaku i fëmijës tim ai.”, shtoi më tej ai.

Ashtu siç pritej, sot janë shuar dy nga akuzat që rëndonin nga Radaçit, duke lehtësuar kështu akuzat e ngritura ndaj tij, që mund të sjellë një lehtësim dhe në masën e sigurisë.

Për rrjedhojë, nga sot e në vijim Radaçi akuzohet vetëm për veprën penale “Shkelja e rregullave të qarkullimit rrugor me pasojë vdekjen”, pasi dy nga akuzat që rëndonin fillimisht ndaj tij, u shuan në bazë të amnistisë së miratuar pak kohë më parë.