Izraeli i ndalon hyrjen kandidatit francez për president

Kandidati francez për president nga krahu i majtë, Jean-Luc Mélenchon, ka reaguar pas vendimit të Izraelit për t’i ndaluar hyrjen në territorin e tij, duke deklaruar se nuk kishte kërkuar të vizitonte vendin.

Reagimi i tij vjen pasi autoritetet izraelite njoftuan të enjten se do të ndalonin vizitën e tij, pas deklaratave për angazhimin e mundshëm të Francës në shoqërimin e anijeve që transportojnë aktivistë dhe synojnë të çojnë ndihma humanitare në Gaza.

Mélenchon deklaroi se, në rast se vjen në pushtet, qeveria e tij do të mbajë një qëndrim të qartë kundër veprimeve të Izraelit në Gaza dhe territoret e tjera të rajonit.

“Izraeli po më pengon të hyj në territorin e tij? Unë nuk kërkova të hyja. Nëse vijmë në pushtet, do të themi atë që kemi për të thënë.

Domethënë: të denoncojmë gjenocidin në Gaza, aktivitetin e kolonizimit në Bregun Perëndimor dhe aneksimin gradual të Libanit jugor dhe Lartësive të Golanit”, u shpreh ai.

Më tej, kandidati francez theksoi se linja e tij politike do të jetë kundërshtimi i asaj që e cilësoi si ligji i më të fortit dhe respektimi i së drejtës ndërkombëtare në çdo rrethanë.

“Të hedhim poshtë ligjin e më të fortit ose më të çmendurit dhe të respektojmë ligjin ndërkombëtar në të gjitha rrethanat: kjo është linja jonë politike”, deklaroi Mélenchon.

“Izraeli do t’u përgjigjet me vendosmëri atyre që kërkojnë ta dëmtojnë atë dhe nuk do të lejojë individë që veprojnë kundër Izraelit dhe nxisin kundër qytetarëve të tij të hyjnë në vend”, tha Ministria e Jashtme izraelite në një deklaratë.

Izraeli tha se do t’i refuzojë gjithashtu hyrjen Mathilde Panot, kryetares së grupit parlamentar të partisë Franca e Papërkulur e Melenchon.Njoftimi vjen një ditë pasi Franca konfirmoi se i kishte refuzuar hyrjen kreut të një organi që përfaqëson vendbanimet në Bregun Perëndimor të pushtuar.

Mélenchon, një kritik i ashpër i Izraelit – i cili nuk kishte ndonjë plan të dukshëm për ta vizituar vendin – deklaroi të shtunën në një fjalim se, nëse zgjidhet, Franca do të “veprojë drejtpërdrejt në mbështetje të palestinezëve”, si në Gaza, ashtu edhe në Bregun Perëndimor.“Anijet franceze, ashtu si ato të Italisë dhe Spanjës, do të shoqërojnë – nëse është e nevojshme – flotilat e qytetarëve të mobilizuar për të afirmuar të drejtat e njerëzve,” tha ai.

Izraeli ka vendosur një bllokadë ndaj Gazës që kur Hamasi mori pushtetin në vitin 2007, dhe i ka kontrolluar pikat e hyrjes edhe më rreptësisht që kur Hamasi kreu sulmin e paprecedentë të 7 tetorit 2023 kundër Izraelit, gjë që shkaktoi një fushatë të gjerë ushtarake.

Një sërë flotilash janë përpjekur të thyejnë rrethimin izraelit. Disa aktivistë nga një flotilë, e cila u ndalua më herët gjatë këtij viti, pretenduan se autoritetet izraelite i kishin keqtrajtuar fizikisht ose seksualisht gjatë kohës që ishin në paraburgim; akuza këto që janë mohuar nga qeveria izraelite.

Më herët, Izraeli u kishte ndaluar hyrjen disa ligjvënësve britanikë të krahut të majtë, përfshirë Jeremy Corbyn – një tjetër kritik i zëshëm – pasi Londra vendosi sanksione ndaj produkteve që vijnë nga vendbanimet.