VIDEO/ Momente tmerri! Ulja e avionit me pasagjerë shkon tejet keq!

Një avion i kompanisë ajrore British Airways përjetoi momente dramatike gjatë tentativës për ulje në aeroportin Heathrow të Londrës, pasi bishti i tij u përplas me pistën në sekondat e fundit përpara prekjes së plotë të tokës.

Bëhet fjalë për një Airbus A321neo, me deri në 220 pasagjerë në bord, i cili rreth orës 11:00 u përplas me pistën me rrotat e anës së majtë, ndërsa pjesa e pasme e avionit goditi sipërfaqen e saj. Për shkak të incidentit, pilotët u detyruan të ndërprisnin uljen dhe ta ngrinin sërish avionin në ajër.

Sipas dëshmive për mediat britanike, në kabinë u dëgjuan britma, ndërsa pasagjerët u shtynë përpara në sediljet e tyre nga lëvizja e papritur e avionit.

Ngjarja u filmua nga një person që po vëzhgonte avionët pranë aeroportit. Një burim e cilësoi incidentin si jashtëzakonisht të pazakontë, duke theksuar se erërat e forta mund të kenë ndikuar në manovrën e avionit.

Megjithatë, hetimet paraprake dyshohet se po shqyrtojnë edhe mundësinë e një vlerësimi të gabuar nga pilotët gjatë uljes.

Avioni kryente fluturimin BA431 nga aeroporti Schiphol i Amsterdamit drejt Londrës. Pas një fluturimi prej 1 ore e 35 minutash, ai arriti të ulej në tentativën e dytë.

Pas uljes, avioni u tërhoq nga shërbimi për t'iu nënshtruar kontrolleve teknike.

Incidenti është raportuar pranë Degës së Hetimit të Aksidenteve Ajrore (AAIB), e cila ka nisur procedurat për të zbardhur shkaqet e ngjarjes.

Një zëdhënës i British Airways konfirmoi se avioni u ul në mënyrë të sigurt dhe se kompania po bashkëpunon me hetuesit, por nuk dha detaje të tjera për shkak të procesit hetimor në vazhdim. /PiranjatNews/