Amortizohen linjat elektrike në Barbullojë, banorët: Linjat elektrike rrezik për fëmijët

Shtylla të amortizuara, linja të dëmtuara dhe tela të varur në disa segmente. Kjo është panorama e rrjetit elektrik në fshatin Barbullojë e Re në Lezhë, ku gjendja e infrastrukturës elektrike është kthyer në shqetësim për banorët.

Në disa pjesë të fshatit, animet e shtyllave kanë bërë që telat të varen pranë banesave dhe rrugëve, duke rritur rrezikun për banorët, veçanërisht për fëmijët dhe kalimtarët. Amortizimi ka prekur jo vetëm shtyllat dhe linjat, por edhe cilësinë e furnizimit me energji elektrike.

Probleme të ngjashme me rrjetin elektrik raportohen edhe në fshatra të tjerë të Lezhës, ku infrastruktura e amortizuar vijon të jetë shqetësim për komunitetet.

Banorët kërkojnë ndërhyrjen e institucioneve përgjegjëse për zëvendësimin e shtyllave dhe linjave të dëmtuara, me qëllim eliminimin e rrezikut dhe garantimin e një furnizimi të sigurt dhe të qëndrueshëm me energji elektrike.