Spanja paralizohet nga greva të përgjithshme 3 javë para zgjedhjeve

Policia u përlesh me protestuesit në Madrid të mërkurën, në një përshkallëzim të dhunshëm të situatës gjatë një greve të përgjithshme në Spanjë. Efektivët e policisë, të pajisur me uniforma kundër trazirave, goditën protestuesit me shkopinj gome dhe mbajtën një prej tyre të shtrirë në tokë gjatë arrestimit. Automjetet e policisë u vendosën në bulevardin Gran Via për të hapur rrugët, të cilat ishin bllokuar nga protestuesit.

unonjësit spanjollë zhvilluan një grevë të përgjithshme të mërkurën, duke dalë në protesta pavarësisht motit të stuhishëm. Ata ngritën pika proteste në kuadër të një mobilizimi masiv kundër krizës së përballueshmërisë së banesave në vend, më pak se tri javë përpara zgjedhjeve të parakohshme parlamentare.

Greva mbështetet nga dy sindikatat më të mëdha të Spanjës, të cilat përfaqësojnë më shumë se një milion punonjës, si dhe nga shoqatat e qiramarrësve, të zemëruara për rritjen e qirave dhe dëbimet nga banesat. Sindikalistët deklaruan në rrjetin social X se policia përdori sprej me piper kundër protestuesve në tregun me shumicë në Madrid dhe arrestoi një prej tyre. Sipas sindikatës, 13 persona patën nevojë për ndihmë mjekësore.

Një zëdhënës i policisë konfirmoi arrestimin, por nuk konfirmoi përdorimin e sprejit me piper. Megjithatë, ai deklaroi se një substancë e tillë ishte përdorur për të shpërndarë një tjetër grup protestuesish në lagjen Carabanchel.

Sindikatat njoftuan se do të paraqesin një kallëzim penal kundër asaj që e cilësuan si një reagim “joproporcional” të policisë gjatë një operacioni ku u përdorën gaz lotsjellës dhe shkopinj gome, duke lënë 20 protestues të plagosur. Të paktën 42 persona u arrestuan gjatë protestave. Greva vjen pas disa javësh protestash në vend, të nxitura nga dëbimi nga banesa dhe vdekja e mëvonshme e një gruaje 87-vjeçare në Madrid. /PiranjatNews/