Manchester City në krizë për shkak të sponsorit

Manchester City po përballet me një tjetër polemikë jashtë fushës, këtë herë për shkak të sponsorit të tij OKX. Kompania e kriptomonedhave është gjobitur me afro 400 milionë paundë në Shtetet e Bashkuara për shkelje të rregullave kundër pastrimit të parave, ndërsa brenda industrisë së futbollit po ngrihen pikëpyetje për faktin që klubi anglez vazhdon bashkëpunimin me të.
OKX, e drejtuar nga miliarderi kinez Mingxing “Star” Xu, u gjobit vitin e kaluar me 504 milionë dollarë, rreth 381 milionë paundë, nga autoritetet amerikane. Një gjykatë në Nju Jork e akuzoi kompaninë se kishte lehtësuar transaksione të dyshimta dhe të ardhura të lidhura me aktivitete kriminale në vlerë prej më shumë se 5 miliardë dollarësh.
Problemet për kompaninë nuk janë kufizuar vetëm në SHBA. Edhe filiali i saj europian është gjobitur në Maltë për shkelje të rregullave kundër pastrimit të parave dhe financimit të terrorizmit. Ndërkohë, autoritetet në vende si Kina, Koreja e Jugut, Tajlanda dhe Holanda kanë zhvilluar hetime të ndryshme ndaj platformës. OKX është gjobitur gjithashtu në Kanada për operim në mënyrë të paligjshme.
Manchester City e nisi partneritetin me OKX në vitin 2022, ndërsa një vit më vonë nënshkroi një marrëveshje sponsorizimi me vlerë rreth 55 milionë paundë. Logoja e kompanisë vazhdon të shfaqet në mëngën e fanellës së klubit.
Situata është bërë edhe më e ndjeshme pasi Manchester City është përfshirë në një proces të gjatë ligjor për çështjet e financave dhe sponsorizimeve. Klubi është shpallur fajtor për shkelje të shumta financiare nga Premier League, vendim që e ka apeluar dhe që City vazhdon ta mohojë.
Një burim i industrisë së futbollit e ka cilësuar “të pabesueshëm” vazhdimin e marrëdhënies me OKX, duke ngritur pikëpyetje mbi kontrollin që klubi kryen ndaj partnerëve të tij.
Manchester City, nga ana e tij, ka deklaruar se ka një bashkëpunim afatgjatë me OKX dhe se kryen gjithmonë kontrollet e nevojshme të verifikimit ndaj partnerëve të biznesit. Kompania e kriptomonedhave nuk ka pranuar të komentojë mbi çështjen.
Lexo edhe
SPORT
Shqipëria pret San Marinon në “Air Albania”, paralizohet Tirana! Ja rrugët që do të bllokohen sot në kryeqytet

Befasi para San Marinos, Feta Fetai mbetet me Kombëtaren A

Poker i Francës dhe leksion italian, 'Gjelat' shkatërrojnë Belgjikën, 'Azzurrët' marshojnë pa u ndalur!

Zlatan Ibrahimovic mbush 45 vjeç dhe i bën vetes dhuratën marramendëse prej 3.6 milionë euro

Koha e të vërtetës për Xhakën, do merret në pyetje nga prokuroria





