VIDEO/ Mijëra njerëz në rrugë, përplasje dhe gaz lotsjellës në Paris 

Mijëra protestues dolën në rrugët e Parisit të shtunën (7 nëntor), në një marshim kryesisht paqësor, me synimin për të denoncuar rritjen e kostos së jetesës dhe mosveprimin e qeverisë franceze.

Demonstruesit marshuan nga sheshi i Republikës (Place de la République) drejt sheshit të Kombit (Place de la Nation). Shumë prej tyre mbanin pankarta dhe banderola, ndërsa këndonin nën ritmet e muzikantëve që shoqëronin protestën.

Protesta e së shtunës ishte demonstrata e katërt radhazi gjatë fundjavave në kryeqytetin francez, por këtë herë pjesëmarrja dukej më e ulët krahasuar me protestat e mëparshme. Mes tyre ishte edhe dita e protestave dhe grevave mbarëkombëtare të së enjtes (5 nëntor), kur të paktën 600 mijë persona dolën në rrugët e Francës.

Policia mbajti një prani të shtuar në të gjithë vendin edhe të shtunën, me 70 mijë efektivë të angazhuar për të garantuar rendin gjatë demonstratave.

Sindikatat dhe organizatorët e tjerë të protestave kanë bërë thirrje për një ditë të re protestash të martën (10 nëntor). /PiranjatNews/